Ministru Prezidensiá Konsellu Ministru (MPKM), Fidélis Manuel Leite Magalhães deklara, alterasaun ba Lei Pensaun Vitalisia ne'e, governu haruka ba Parlamentu Nasionál iha tinan 2020.

“Kona-ba alterasaun LPV, MRLAP (Ministru Reforma Lejislativa no Asuntu Parlamentár) mak autór ne'ebé prodúz to'o hetan aprovasaun iha Konsellu Ministru iha fulan-fevereiru tinan 2020. Haruka kedan proposta Lei ba PN dezde tinan kotuk”, informa Fidélis iha pájina facebook, kinta (17/06).

Tanba iha fulan-fevereiru tinan 2020, Konsellu Ministru hala'o sorumutu hodi aprova rejíme juridiku seguransa sosiál ba ritulár sira orgaun soberania nian.

Nune'e, haruka ba Parlamentu Nasionál atu diskute hodi halo aprovasaun, maibé to’o agora seidauk.

Maibé, deputadu Bankada Frente Revolusionáriu Timor-Leste no Independente (FRETILIN), Joaquin dos Santos hatete, PN difísil atu halakon lei pensaun vitalísia, tanba direitu ne'e Konstituisaun Repúblika Demokratika Timor-Leste garantia.

Maske Governu liuhusi Ministériu Solidariedade Sosiál no Inkluzaun (MSSI) haruka ona proposta rejime kontribuitivu ba Parlamentu Nasionál kona-ba oinsá halakon lei pensaun vitalísia.

Maibé, Parlamentu Nasionál mós tenke haree no estuda didi'ak tanba prosesu muda pensaun vitalísia ba rejime kontribuitivu la fasíl.

“Lei pensaun vitalísia ne'e laiha ona, agora ne'e iha de'it rejime kontribuitivu, tanba ne'e presiza regra ida husi Ministèriu Solidariedade Sosiál no Inkluzaun (MSSI) hodi garante rejime ne'e entre vigór labele prejudika ema nia diretu. Ida ne'e mak ita sei estuda, tanba buat ne'e la'ós fasil, ita fó ou ita la fó, kuandu ba rejime”, hatete nia iha PN, kinta (17/06).

Tanba alterasaun ba lei pensaun vitalísia ne'e, la'ós halo atu responde ba komprimísu eleitorál ka fó benefísiu ba grupu no sosiedade sivíl sira, maibé ida ne'e halo atu rezolve problema ne'ebé Timor-Leste hasoru. (*)