“Osan aloka ba EDTL atu sosa mina to'o ba ida ne'e. Sé ita liu ida ne'e, laiha osan para ita sosa tan mina. Tanba ne'e mak ita lorloron oras 5. Mais ba oin ita haree halo planu para ita iha intervensaun sira oinsá mak ita iha opsosaun atubele prodúz enérjia ne'e ba 24 oras”, hatete Paulo da Silva hafoin hasoru malu ho Primeiru Ministru, Taur Matan Ruak iha rezidénsia, Farol, sesta (18/06).
Maibé tuir planu iha tinan 2021 ne'e, Ministériu Obras Públikas (MOP) liuhusi EDTL sei hahú projetu eletrifikasaun hodi instala riin no liña eletrisídade ba populasaun sira iha Postu Administrativu Ataúro, munisípiu Dili ne’ebé seidauk asesu.
“Ohin ami mai partilla ho sua exelénsia Primeiru Ministru, kona-ba servisus eletrisidade ninian, e sua exelensia husu planu liliu ba Ataúro. Entaun, ohin partilla ho sua exelénsia katak, tinan ida ne'e, projetu eletrifikasaun ne'ebé ita promove ita sei halo iha suku tolu, ida manutensaun ba liña ezisténte, no ida ne'e iha villa ba Beloi. Depois halo projetu foun ba suku Makili no suku Makadadi”, dehan nia.
Tanba projetu eletrifikasaun ho pakote hamutuk 34 lansa ona ba públiku, maibé iha projetu 30 loke ona konkursu públiku, no iha projetu 4, sira EDTL rasik promove hodi responsábiliza direta.
Aleinde ne'e, EDTL mós orienta ona ekipa tékniku sira, halo dezeñu ho Bill of quantities (BOQ) ba suku restu sira ne'ebé durante seidauk asesa ahi-eletrisidade.
Bainhira planu sira dezeña hotu ona, iha fulan-agostu tinan 2021 nia laran sei lansa tan konkursu públiku ba suku sira ne'e.
“Razaun tanba, ita-nia populasaun hein tinan 20 liu ona, suku sira ne'e seidauk asesu. Entaun, ne'e obriga ita para ita tenke halo intervensaun ida rápidu ba nesesidade eletrisídade nian, tanba projetu inklui iha pakotes 34 ne'e, 3 mak iha Ataúro, 2 projetu foun ba Makili ho Makadadi, ida manutensaun ba liña ezisténsia husi Maumeta Villa ba suku Beloi”, informa nia.
Enkuantu, kona-ba reseita ne'ebé EDTL rekolla husi fulan-janeiru to'o maiu tinan 2021, sira koleta ona osan hamutuk millaun US$13,4 husi enérjia pulsa eletrisídade. (*)
