Klíbur Estudante no Juventude sira ne'ebé hamahan-an iha organizasaun voluntáriu ne’e halo atividade refere, iha loron sábadu (19/06) hodi ko’alia kona-ba international day for the girls.
“Ita ko’alia sobre loron feto sira-nian oinsá atu hatene sira-ninia loron menstrusaun ne'e mai, no oinsá proibidu ba iha relasaun seksual ho mane sira. Entaun, mensajen ne'ebé ami hato'o ba alin sira mak, hanesan sidadaun feto ida, oinsá mak sira bele kuidadu sira nia-an ho di'ak, antes susesu sai inan ida”, hatete Reprezentante Rotaract Club Of Manatuto, Filipe Soares ba www.tempotimor.com, liuhusi telemóvel, sábadu (19/06).
Durante sosialiazasaun, estudante sira hato'o sentimentu haksolok, tanba bele simu informasaun no koñese kona-ba loron internasional ba feto sira-nian, no husu atu hakarak envolve-an mós iha organizasaun voluntáriu refere.
Aleinde ne'e, esplika mós kona-ba ezisténsia husi ekipa Rotaract Club Of Manatuto nian ba estudante DOMBALA sira iha Laklubar, no oinsá nia progresu husi atividade sira ne'ebé durante ne'e hala'o ona.
Tanba misaun husi organizasaun Rotaract ne'e nian mak atu hala'o asaun ho voluntáriu hodi ajuda fó tulun ba ema hotu, liu-liu ba família vulnerável sira área rurál.
"La'ós foin ohin de'it mak halo formasaun iha ne'e, mais antes ne'e mós ita fahe formasaun ba estudante sira iha eskola Kay Rala Manatutu, e ami mós ajuda ona postu saúde sira tomak iha postu saúde sira ho sasan bázika hanesan manta, inklui halo mós distribuisaun nesesidade báziku ba familia kbi'it laek no difisiente sira iha Laklubar”, hateten nia.
Totál estudante sira iha eskola Sekundária Dom Basílio do Nascimento Laklubar (DOMBALA), hamutuk na'in-60 no maiória feto.
Entretantu, ezisténsia Rotaract Club Of Manatuto hari'i iha loron 02 fulan-fevereiru tinan 2018, no hetan mós legalizasaun iha nível internasional liuhusi Rotry International ne'ebé kria mós nia parseria ho rotaract club sira seluk husi Munisípiu 12 no RAEOA. (*)