Tempotimor (Dili)-Governu liuhusi reiuniaun Konsellu Ministru (KM) nian iha loron 23 fulan-juñu tinan 2021 aprova ona autorizasaun ba abertura prosedimentu aprovizionamentu konkursu públiku ba akizisaun ró peska industriál nian rua, ho kapasidade 250 GT, tuir projetu ne’ebé aprezenta husi Sekretáriu Estadu Peska, Elídio de Araújo.
Ministru Prezidénsia Konsellu Ministrus, Fidelis Manuel Leite Magalhães, hatete husi aprovasaun ne’e atu hasa’e kuantidade ika hodim hamenus presu iha merkadu.
“Akizisaun ba ró hirak ne’e hakarak kontribui ba dezenvolvimentu iha setór peska nasionál, atu hasa’e kuantidade ikan ne’ebé peska, hamenus presu ikan iha merkadu nasionál, hametin soberania marítima nasionál, hapara peska ilegál no asegura utilizasaun rekursu peskeiru ho forma responsavel no sustentavel ba futuru”, esplika Ministru Fidelis, iha palásiu Governu, kuarta (23/06). (*)