“Hafoin halo análize ba aprezentasaun husi Pontu situasaun epidemiolójika nasionál, husi Sala Situasaun Sentru Integradu Jestaun Krize, Konsellu Ministrus delibera atu propoin ba Sua Eselénsia, Señor Prezidente Repúblika, Francisco Guterres Lú Olo, ba renovasaun estadu emerjénsia, ba loron tolu-nulu tan”, infroma Ministru Prezidénsia Konsellu Ministrus, Fidelis Manuel Leite Magalhães, iha Palásiu Governu, kuarta (23/06).
Tanba ne’e, hodi atende ba evolusaun preukupante situasaun epidemiolójika no proliferasaun kazu rejistadu husi kontájiu COVID-19, ho hanoin atu evita no neutraliza risku propagasaun sira husi SARS-CoV-2.
Nune’e bele proteje saúde públika no kapasidade resposta ba Sistema Nasionál Saúde, Governu propoin ba Prezidente Repúblika katak, ho renovasaun estadu emerjénsia, atu permite suspensaun no restrisaun ba direitu no garantia fundamentál balun. (*)