“Konsellu Ministrus delibera ona atu autoriza loke prosedimentu aprovazionamentu ba mákina raiu X tolu hodi halo inspesaun ba veíkulu, bagajem liman no ema nian, utiliza husi Autoridade Aduaneira iha Postu Integradu Batugade no Salele, tuir projetu ne’ebé aprezenta husi Ministru Finansas”, informa Ministru Preidénsia KM, Fidélis Leite Magalhães, iha Palásiu Governu, kuarta (23/06).
Aliende ne’e, KM mós aprova projetu deliberasaun kona-ba kritériu rasionalizasaun Estrutura Programátiku husi Orsamentu Jerál Estadu (OJE) ba tinan 2022, ne’ebé aprezenta mós husi Ministru Finansas.
Ba OJE tinan 2022 nian hala’o ona alterasaun balun iha rasionalizasaun estrutura programátika hodi hasa’e efisiénsia no efikásia iha ninia ezekusaun, nomós hasa’e kapasidade monitorizasaun no kontrolu ba implementasaun husi programa ho atividade ne’ebé propoin. (*)