“Prezidente Repúblika liuhusi dekretu Prezidente Repúblika númeru 38/2021, 29 juñu, nomea Engeñeru José Maria dos Reis, Vise Primeiru Ministru no Ministru Planu no Ordenamentu nu’udar Enviadu Estraordináriu Prezidente Repúblika ba XIII konferénsia Xefe Estadu no Governu Comunidade dos Paises de Lingua Portuguesa (CPLP)”, deklara PR Lú Olo liuhusi komunikadu imprensa, kuarta (30/06).
Nune'e iha loron 17 fulan-jullu tinan 2021, iha Luanda, Angola, XIII Konferénsia Xefe Estadu no Governu CPLP sei hala’o ho partisipasaun husi ninia Xefe Estadu membru.
Tuir konstituisaun Repúblika Demokrátika Timor-Leste estabelese iha númeru 1 husi artigu 74 hatete katak, Prezidente Repúblika nu’udar simbolu no garante independensia nasionál, unidade estadu no funsionamentu regular instituisaun demokrátika.
Haree ba interese espesiál ba reprezentasaun Repúblika Demokrátika Timor-Leste, sai nesesáriu hodi nomea Enviadu Estraordináriu Prezidente Repúblika iha Simeira altu nível ida ne’e maske iha situasaun pandémika ne’ebé la’o hela iha nível globál no nasionál no implementasaun estadu emerjénsia nia laran. (*)
