Akordu ne’ebé halo iha loron sábadu (03/07) ho parseiru sira hanesan Instituisaun Rádiu Televizaun Timor-Leste, emprezáriu públika (RTTL.ep), Universidade Nasionál Timor-Leste (UNTL), Institutu Nasionál de Dezenvolvimentu de Mão-de-Obra (INDMO), no Teknolojia Informasaun no Komunikasaun (TIC Timor).
SEKoop, Elizario Ferreira hatete, akordu ne’ebé halo atu estabelese departementu jestaun kooperativa, hodi produs rekursu umanu, ka lisensiadu konpetente atu bele asegura sustentabilidade instituisional, asegura estabilidade finanseira no ekonómika kooperativa nian.
“Segundu sei hamosu ensinu kooperatuva ida iha parte ensinu superior liliu iha UNTL atu asegura poupansa iha nivél dosente sira nomós iha nível estudante sira”, esplika nia iha salaun Rudal, Osindo, sábadu (03/07).
Tanba ne'e, akordu kooperasun ne’ebé asina tenke halo ona diskusaun tékniku, tanba tenke prepara kuríkulum sira, prepara métodu hanorin sira, dosente sira, tekniku sira sei halo diskusaun, nune'e bainhira tama akadémiku foun bele introduz ona.
Maibé parte seluk, asina akordu kooperasaun ho RTTL.ep, tanba ko’alia kona-ba promove partisipasaun sidadaun nian ba vida kooperativa.
Iha mós akordu ho Institutu Nasionál de Dezenvolvimentu de Mão-de-Obra (INDMO), atu asegura formadór ne’ebé kualidade, atubele kontribui ba formasaun, edukasaun kooperativa nian.
Enkuntu kona-ba akordu Teknolojia Informasaun no Komunikasaun (TIK) atu asegura dezenvolvimentu teknolojia ida tanba kooperativa mós dadauk prepara hela planu ida kona-ba dijitalizasaun, oinsá kooperativa bela hala'o nia servisu.
"Iha mundu ida agora ne'e ema bolu modelu oioin, iha kooperativa ne’ebé móvel, iha kooperativa ne'ebé estatiku, iha ninia sede, maibé barak liu ona, até banku sira iha rai sira ne’ebé modernu ne'e, banku sira ne’ebé mak fizikamente dalaruma ita la haree, maibé ninia servisu la'o teb-tebes”, dehan nia. (*)