"Impaktu ne'e laiha ratifikasaun, troka notas iha 30 Agostu ne'e sei la akontese," hatete Xanana ba Jornalista sira iha Parlamentu Nasionál, Dili, Tersa (23/07). 

"Ita sei hein tok Prezidente-Repúblika vontade ... ne'e ha'u fiar katak nu'udar Prezidente-Repúblika nia sei halo tuir saida mak Konstituisaun fó," afirma Xanana.

Entretantu Kapitulu II hosi Konstituisaun RDTL iha artigo 85 kona-bá kompeténsia Prezidente-Repúblika nian iha alinea C katak, Prezidente-Repúblika hala'o direitu vetu kona-bá diploma lejislativa nian, iha prazu loron 30 nia laran hahu hosi loron simu nian. 

No iha artigo 88 kona-bá promulgasaun no vetu iha número dahuluk katak, iha prazu loron 30 nia laran, hahu hosi simu diploma naran ida hosi Parlamentu Nasionál atu promulga hanesan Lei, Prezidente Repúblika bele promulga eh uja direitu vetu nian, hodi husu apresiasaun foun kona-bá lia-tatoli ne'e ho fundamental. 

Faktu hatudu katak, hafoin Prezidente-Repúblika, Francisco Guterres Lú-Olo assume nia funsaun ne'e sempre uja nia direitu vetu ba lejislasaun sira iha rai laran hanesan rejeita kandidatu membru governu sira hosi partidu CNRT ho KHUNTO ba estrutura governu atual, veta Orsamentu Jeral Estadu (OJE) 2018, veta alterasaun dahuluk Lei Atividade Petroliferu nune’e mos husi sorin seluk Parlamentu Nasional blokeia PR Lu Olo ba halo visita estadu ba rai liur. 

Entretantu sinal hatudu ona iha Parlamentu Nasionál katak, bankada opozisaun FRETILIN hatuur ona nia pozisaun politika klaru hodi vota kontra total pakote lejislasaun 4, hahu hosi votasaun jeneralidade to'o iha votasaun final global, no kontinua vota kontra ratifikasaun fronteira tasi nian ne'ebé kontradis ho PR, Lú-Olo ne’ebe mos hanesan PREZIDENTE PARTIDU FRETILIN nia deklarasaun antes ne'e katak, sei laiha ema ida mak atu kontra tratadu fronteira tasi nian, maibé bankada FRETILIN rasik kontra tiha ona ho total votu 23.