Prosesu ba atividade marsa saudável hala'o husi edifísiu Ministériu Negósiu Estranjeiru no Kooperasaun (MENK) Pantai Kelapa to'o mai iha Largo Lesidere.
Prezidente Komisaun Funsaun Públika (KFP), Faustono Cardoso hatete, tuir ajenda no planu ba marsa saudável ne’ebé sira hala'o lolos hetan partisipasaun husi ema atushaat, tanba covid-19 entaun ema atus-ida-resin de'it mak partisipa.
“Ohin dia 10 de jullu 2021, dadersan de'it, Ministériu Saúde, hamutuk ho Komisaun Funsaun Públika (KFP), liuhusi ekipa organizadora ba komemorasun dia nasionál KFP, ba dala-hitu, hala'o atividade ne’ebé ami hanaran marsa saudável, la'o saudavel. Ne'ebé partisipasaun ne'e barak, ema atusida-resin, maske planu ba ema atushaat tuir ajenda, kalendáriu, planu ne'ebè mak iha”, dehan nia iha Largo Lesidere, sábadu (10/07).
Prosesu husi atividade marsa saudável ida ne'e, sai nu’udar lisaun ida ba funsionáriu públiku hotu, liliu mákina estadu hotu, oinsá mak sira bele tau importánsia ba ida-idak nia saúde.
Tanba, situasaun ida Timor-Leste enfrenta agora mak pandemia covid-19, ne’ebé halo sidadaun hotu preokupa, maibé tenke sai ona realidade, gosta ka la gosta, hothotu sei moris hamutuk ho covid-19.
“Katak oinsá liuhusi marsa ida ne'e, bele fó lisaun ida, fó alerta, fó hanoin, kona-ba importánsia ema ida-idak, atu haree saúde ne'e ho sériu, hahú husi nia-an, katak oinsá mak bele hala'o atividade ne’ebé mak saúde di’ak”, dehan nia.
Ho ida ne'e, husu ema hotu tenke okupadu ho sira ida-idak nia servisu, maibé buka atu haluha nafatin tempu halo ezersisiu hodi kuidadu nafatin saúde.
Enkuantu, loron 15 jullu nu’udar loron, nasionál ba funsaun públiku, no ko’alia kona-ba funsaun públiku ne'e sei haree kona-ba funsionáriu públiku ne’ebé mak halo parte husi mákina estadu hodi serbi no presta servisu ba povu no nasaun, oinsá buka realiza mehi lulik sira ne'ebé konstituisaun mós dehan katak oinsá mak akompaña lori povu hakbesik ba moris di’ak, tuir setór ida-idak nian. (*)