Vise Prezidente Parlamentu Nasionál (PN), deputadu Luis Roberto hatete, atetude husi autoridade lokál balun ne'ebé ho ilegalmente haruka populasaun sira hatama osan atu hetan diretu ba pagamentu idozu nian.
"Ha’u hakarak ko’alia nafatin sobre ita-nia autoridade lokál sira ne’ebé mak halo kobransa ba ita-nia inan-aman sira ne'ebé mak hodi idade avansadu sira, molok atu simu sira-nia osan idozu ninian, kada pesoál sira kobra $1 dólar. Halo nusa para husu ba governu para bele hapara tiha hahalok ida ne'e”, hatete nia iha plenária PN, tersa (13/07).
Tanba ne’e, husu ba Pesoál Saúde sira iha territóriu Timor-Leste laran, atu labele halo ameasa ba populasaun sira ne’ebé idade avansadu katak la simu vasina sei la hetan diretu ba osan idozu.
"E husu mós ba pesoál saúde sira, karik tun ba terenu atu halo vasinasaun ba ita-nia emar sira ne’ebé mak idade avansadu sira ne'e, labele hasai informasaun ameasa ida ba sira katak kuandu la vasina, la simu osan idozu ninian, ida ne'e favor ida hapara buat liafuan sira hanesan ne'e”, dehan nia.
Bainhira médiku sira fó informasaun sira ne'e ba populasaun sei fó impaktu ba populasaun sira-nia vida.
"Liafuan sira ne'e bele oho ema, bele akontese, ne’ebé husu ba señor ministru Asuntu Parlamentar no Komunikasaun Sosiál (MAPKomS), kuandu enkontru ruma iha konsellhu ministru karik, favor ida hato'o ida ne'e”, afirma nia. (*)