Tanba mosu funsionáriu mate klamar hanesan kazuál iha MTK hamutuk 200, ne’ebé la hala’o servisu no tur de’it iha uma maibé simu saláriu.
“Informasaun sira ne’e agora la’o hela, e dieskonfia MTK prátika hela hahalok ne’e, tan ne’e Ministru presiza atu haree”, hatete Leandro iha Parlamentu Nasional (PN), tersa (13/07).
Tuir lolos ema hothotu halo servisu mak foin hetan direitu, maibé MTK la dun fó atensaun tanba ema balun tur de’it iha uma simu saláriu.
Bainhira ida ne’e akontese, MTK tenke hola desizaun hodi hapara funsionáriu kazuàl ne’ebé mak tur de’it iha uma.
Maibé Deputadu Bankada Kmanek Haburas Unidade Nasionál Timor Oan (KHUNTO), Luís Roberto, rejeita ho deklarasaun ne’e tanba konsidera laiha faktu.
"Foin ha’u-nia maluk deputadu Leandro Lobato ko’alia kona-ba funsionáriu Mate Klamar sira iha Ministru Transporte Komunikasaun ninian, dehan katak iha uma de'it, simu osan ida ne'e, ita presiza halo justifikasaun ne’ebé klean”, afirma nia iha plenáriu PN, tersa (13/07).
Tanba bankada KHUNTO simu informasaun, Ministru Transporte no Komunikasaun (MTK), José Agustino da Silva, laiha koiñesimentu no lahatene deputadu sira hetan informasaun husi ne'ebé.
"Ne’ebé favor ida, ita deputadu sira-nia papel ne'e, klaru que bazeia ba konstituisaun RDTL artigu 92 ne'e, fiskalizasaun ne'e ita iha kompeténsia atu ko’alia kona-ba ida ne'e, ha’u hakarak ne'e ita justifika uluk mak ita ko’alia, para realidade iha”, dehan nia.
Bainhira deputadu sira ko’alia laiha faktu no la sai realidade ida ne'e, sei fó impaktu ba konsiénsia públiku tanba ema jeneraliza tiha ona katak ida ne'e mak los.
"Ha’u hatene fatin ne'e fatin polítika maibé polítika ho konstrutivu”, afirma nia. (*)