“Tinan ida ne'e seidauk bele konstrui Portu Hera, tanba tinan kotuk ita la koloka osan, laiha orsamentu atu halo estudu, so tinan ida ne'e mak iha alokasaun Orsamentu”, dehan Filomeno Paixão, hafoin reuniaun ho Prezidente Repúblika, Francisco Guterres ‘Lú Olo’, iha palásiu prezidensiál Bairopite, sesta (16/07).

Maske alokasaun orsamentu ne'e rasik halo hela preparasaun aranzamentu ho Austrália atu ko'alia kona-ba doasaun Portu ne'e ho Ró.

“Tanba Portu ne'e tenke prontu ona too iha fin 2023, para ita simu Ró rua ne'e, kona-ba ita-nia parte iha defeza mós halo estudu ona hamutuk ho F-FDTL, no ami buka hatene mais ou menus estuda atu hatene folin ba Portu Hera ne'e hira”, dehan nia.

Nune'e Portu ne'e sei fahe ba fatin tolu hanesan A B no C, no estudu ida ne'e entrega hotu ona ba Prezidensiá konsellu Ministru (PCM).

“Portu ne'e fahe ba fatin tolu A, B no C, iha parte B Austrália sira mak halo A ho C ita mak halo, ida ne'e ami husu ona ba konsultan sira halo estudu, ita hetan proposta ita hasa'e ona ba PM mais ou menus atu halo parte kebra mar, purtantu taka be tahu ne'ebé husi mota ba parte loromonu ne'e labele tama ba tasi no ondas ne'ebá labele mai,ida ne'e estudus entrega hotu ona ba Prezidensiá konsellu Ministru”, afirma nia.

Entretantu kalkulasaun ba ida ne'e maizoumenus iha opsaun rua hanesan millaun 50 no millaun 90, seidauk hatene governu deside ida ne'ebé tanba ne’e sei hein hela. (*)