Kongresista Amerikanu hosi Partidu Demokrátiku (PD), David Price hosi Karolina Norte ne'e hatete, desde tinan 2006 to'o ohin loron sira konsege vizita ona Timor - Leste ba dala Lima. No durante tinan hirak nia laran mós membru Parlamentu sira hamutuk ho funsionariu balun ba ona Amerika hodi troka esperiensia ba malu kona-bá oinsá bele hametin liutan Parlamentu no mós hametin liutan lasu kooperasaun bilateral entre nasaun rua nian. 

Kongresista Price mós define demokrásia ne'e la'ós de'it kona-bá eleisaun sira, maibé mós kona-bá reprezentante governu nian ne'ebé efetivu.

"Ami hadomi Timor. Ami kontente tebes mai iha ne'e hasoru malu ho Prezidente Parlamentu Nasionál ho nia ekipa sira inklui Xefe bankada sira ne'ebé hetan asentu iha Parlamentu," hatete Kongresista Price ba Jornalista sira iha Parlamentu Nasionál, Dili, Segunda (29/07).

Iha fatin hanesan, Kongresista Vern Buchanan (Partidu Repúblikanu) hosi Florida katak kuaje tinan 10 nia laran nia hala'o servisu ba Timor - Leste, no kontente katak nasaun ki'ik iha prestasaun di'ak tebes iha liberdade imprensa no liberdade espresaun iha rejiaun Sudeste Aziatiku. 

Entretantu, Prezidente Parlamentu Nasionál, deputadu Arão Noe de Jesus Amaral mós sente kontente tebes ho vizita Kongresista Amerikanu sira ne'e iha Timor - Leste liliu iha Parlamentu Nasionál hodi bele hametin liutan kooperasaun bilateral nasaun rua nian. 

Tuir informasaun balun ne'ebé Tempo Timor asesu katak Kongresista hirak ne'e foin to'o Timor - Leste iha loron Domingu (28/07), no iha Domingo kalan konsege han hamutuk ho Xefe Negosiador Fronteira Maritima, Kay Rala Xanana Gusmão iha El Legendario. 

Tuir ajenda, ohin lorokraik sei ba hasoru malu tan ho Primeiru-Ministru, Taur Matan Ruak no sei hasoru malu mós ho Prezidente-Repúblika, Francisco Guterres Lú Olo iha loron Tersa (30/07).