Tempotimor (Dili)-Xefe Bankada Partidu Libertasaun Popular (PLP), deputadu Cornelio Gama ‘L-7’ hatete, prosesu kandidatura ba eleisaun Prezidénsia Repúblika (PR) tenke mai husi jerasaun tuan no foun, tanba tinan 2030-2040 nasaun ne'e sei entrega ba jerasaun foun sira.

“Husi jerasaun foun ho tuan tenke hamutuk, labele tuan de'it ho foun de'it, purzemplu ha’u tuan, alin sira mai aprende ha’u-nia prinsípiu ida ne'ebé di’ak imi hili, ida ne'ebe at imi soe, para ita atu ulun ita-nia nasaun ne'e didi’ak, hanesan nasaun sira seluk”, hatete nia iha Parlamentu Nasionál (PN), kuarta (21/07).

Haree ba eleisaun prezidente republika ne'ebé sei akontese iha tinan 2022, bainhira líder rejisténsia ida kandidata-an, jerasaun foun sira bele envolve-an hodi servisu hamutuk para aprende hahalok no buka hatene nune'e tinan seluk sira mós ba kandidata-an, labele dehan jerasaun tuan de'it.

Tanba ne'e nu’udar deputadu mai ho prinsipiu rasik, ne'ebé foinsa’e ne'e tenke servisu hamutuk no tenke kaer nasaun.

“Ita-nia rai ne'e foun, kiik oan hela, tanba ne'e oinsá mak prepara to'o 2030-2040 ne'e imi mak kaer ona nasaun”, dehan nia.

Maibé, Deputada Bankada Partidu Demokrátiku (PD), Elvina Sousa de Carvalho konsidera, lei mós fó dalan ba feto sira atu envolve iha palku politika.

Ho ida ne'e, feto barak mak hahú partisipa vida politika tanba sira mós sente no konsiénsia katak lei fó dalan atu partisipa iha atividade politika. (*)