Vise Prezidente Parlamentu Nasionál (PN), Luis Roberto hatete, estadu kria instituisaun liliu organizasaun rede feto atu hala'o servisu asegura no proteze feto sira maibé realidade la akontese.

“Relasiona ho bebé ne'ebé mak soe iha Manleuana, ita kria instituisaun barak-barak hanesan rede feto sira atu fó protesaun ba labarik feto sira ne’e inportante mak sira-nia servisu, labele akontese tiha mak ita ko’alia buat barak mais buat ne'e akontese liu tiha ona. Entaun instituisaun sira ne'ebé ita kria barak-barak iha nasaun ida ne'e presiza halo sira-nia funsaun ho di’ak”, hatete nia iha PN, kinta (22/07).

Tanba haree ba situasaun inan-feton sida ne'ebé soe bebé iha área Manleuana, konsidera krime, liiu kontra ukun fuan maromak katak labele oho ema maibé realidade inan feton sura kontinua hanoin atu oho nia oan.

“Tanba ne'e kontra mós maromak nia ukun fuan ne'ebé dehan katak lalika oho ema maibé ita-nia ema oho nafatin liliu inan feton sira ne'ebé mak seidauk prontu atu forma família maibé sira mane feto hakarak hamutuk lalais depois hetan tiha labarik ikus fali mai soe tiha iha ai-laran no mota ibun sira ne'e”, hatete nia.

Husu nafatin ba instituisaun rede feto sira, nomós instituisun hanesan Polísia Sièntifika no Investigasaun Kriminál (PSIK), no Polísia Nasionál Timor-Leste (PNTL) inklui autoridade lokál sira atubele buka tuir inan ne’ebé mak soe bebé ne'e.

Ba dahuluk tenke halo uluk protesaun ba labarik bebé ne'e, no agradese mós ba sidadaun ne'ebé hetan, maibe rede feto ne'ebé mak foti bebé oan ne'e mós ninia inisiativu ne'e di’ak.

“Ne'ebé ha’u fiar katak ida ne'ebé mak hetan, no instituisaun rede feto ne'ebe foti ha’u fiar katak parte rua ne'e sei iha liña kordenasaun ba malu”, dehan nia. (*)