"”Durante ne'e RTTL,ep sei uza sistema analog maibé iha Oitavo Governu Konstitusionál ida ne'e hakarak halo transformasaun ba sistema dijitál tuir plataforma moderna ne'ebé mundu adopta ba daudaun ne'e hodi garante kualidade informasaun ba povu iha nível nasionál to'o iha baze”, dehan Francisco Jerónimo iha salaun Postu Administrativu Kailako, segunda (26/07).

Tanba ne'e, Governu esforsu atu fornese informasaun to’o iha baze atu nune'e fasilita komunidade sira no la presiza atu sosa tan parabola.

Bainhira sosa parabola ho kustu ne’ebé boot maibé programa ne'e hakarak oferese gratuita ba entidade hotu ba faze primeiru ne'ebé Kailako hola parte ba ida ne'e.

Iha fatin hanesan Prezidente Autoridade Munisípiu Bobonaru, Ernesto de Oliveira Bareto, agradese tanba bele ajuda ona komunidade asesu ba informasaun iha RTTL.

“Lori Povu Munisípiu Bobonaru nia naran hakarak hato’o agradese uain ba oitavu Governu konstitusionál   ninian liuhusi MAPKOMs ne’ebé mak prioritiza ona postu administrativu Kailaku hodi halo sosializasaun programa sistema dijitalizasaun RTTL,ep nia iha Munisípiu Bobonaru, tanba ida ne'e ajuda tebes ami atu asesu ba informasaun iha rai laran”, hatete nia.

Entretantu partisipa iha Atividade sosializasaun ba instalasaun sistema DTMT hanesan, prezidente Autoridade Munisípiu Bobonaru, Komandante Polísia Eskuadra Kailaku, Reprezentante husi Telemor, Inspetór Jerál MAPKomS, Diretór Planeamentu no Diretór DNDI, Administradór Postu Kailaku, Xefe suku, xefe aldeia no entidade relevante sira seluk. (*)