“Bankada CNRT lakohi rona katak orsamentu ida ne’e atu haruka filafali ba kofre estadu, tanba Governu de Faktu husu orsamentu ida ne’e bazeia ba programa”, hatete deputada Bankada CNRT, Terezinha Viegas, iha diskusaun Estensaun Estadu Emerjénsia ba dala-16 iha Plenária Parlamentu Nasional, tersa (27/07).

Tanba, Orsamentu Jerál Estadu 2021 ho montante Biliaun US$2.1 ne’ebé Parlamentu Nasionál aprova, bazeia ba programa ne’ebé governu rasik aprezenta.

Ho ida ne'e, ezije atu Governu implementa programa sira ne’e ba povu nia moris di’ak, bazeia ba komprimisu ne’ebé Xéfe Governu Taur Matan Ruak promete iha Parlamentu Nasionál bainhira aprezenta OJE 2021.

Husu mós Ba governu atu aselera pagamentu ba liña frente hanesan, membru PNTL no F-FDTL, Guarda Prizaun, médiku sira, enfermeiru, jornalista no ajente sira ne’ebé servisu direta hodi hasoru Covid-19.

Aleinde ne’e, halo mós pagamentu ba ótel sira ne’ebé uza ba kuarentena no izolamentu, nune’e mós aselera pagamentu ba emprezáriu Timoroan sira ne’ebé fornese servisu catering ba fatin izolamentu no kuarentena.

Rekomendu mós governu atu aselera pagamentu ba emprezáriu Timoroan sira ne’ebé implementa ona programa sesta bázika, tanba oras ne’e kompaña lokál balun moris iha situasaun tusan nia laran.

"Prosesa no aselera lalais pagamentu ba reklamante sira ne’ebé seidauk simu pagamentu subsídiu familiar US$200, tanba reklamante barak mak seidauk simu to’o ohin loron”, dehan nia.

Iha fatin hanesan Deputadu bankada Fretilin, José Agustinho Siqueira "Somotxo", husu governu atu rezolve subsídiu ba pesoál saúde, Polísia no forsa inklui entidade sira seluk ne’ebé serbisu iha liña frente.

Tanba desde tinan 2020 to'o 2021 pesoál balun seidauk hetan sira-nia diretu ba subsídiu frontline nian. (*)