Prezidente PN, Aniceto Longuinhos Guteres Lopes hatete, servisu ne'ebé komisaun espesializada tolu hala'o ne'e bazeia ba mandatu husi plenária ninian, atubele tau prioridade ba diskusaun no aprovasaun espesialidade ba Projetu-Lei Majistradu Judisiál no Proposta-lei Estatutu Ministériu Públiku (MP) nomós Proposta-Lei Enkuadramentu Orsamentu Jerál Estadu no Jestaun Finanseira ne'ebé governu aprezenta.
“Iha komisaun-rua ba halo diskusaun no aprovasun espesialidade. Komisaun A trata pakote lei judusiáriu ninian, lei organizasaun funsionamentu dos tribunais, iha lei estatutu dos Ministériu Públiku, no estatutu majistradu judisiál, pois komisaun C trata lei enkuadramentu Orsamentu e jestaun finanseiru ninian, hothotu halo aprovasaun iha espesialidade”, informa Aniceto iha PN, kuarta (28/07).
Tanba, meza Parlamentu Nasionál mós hein hela, karik Komisaun konsege halo hotu durante periodu resesu, entaun Komisaun Permanente bele konvoka plenária estraordinária ruma atu halo aprovasaun finál globál, hodi bele haruka ba Prezidente Repúblika (PR) atu hetan promulgasaun.
“Ida ne'e sira servisu loloos parlamentu durante tempu resesu laiha atividade lejislasaun no fiskalizasaun maibé tanba ho mandatu plenária nian, plenária PN nia-sira hala’o servisu iha ne'e atu apronta lei sira ne'e antes termina programa resesu, liliu to'o 31 de agostu”, hatete nia.
Desizaun PN hodi mantein halo diskusaun iha tempu resesu, tanba iha loron 15 fulan-setembru, parlamentu sei loke hikas ona sensaun lejislativa foun nomós iha fulan-outumbru hahú konserta fali ba Orsamentu Jerál Estadu (OJE) 2022.
Tanba ne'e parlamentu presiza aselera atubele trata hotu lei sira ne'ebé iha hela PN.
“Hanesan babain kuandu tama ona fulan-outumbru ne’e, parlamentu nia konsentrasaun ne'e ba ona Orsamentu Jerál Estadu (OJE). Governu parese promete hatama orsamentu jerál estadu ne'e iha 1 de outumbru, entaun ami iha 15 dias antes de 1 de outumbru ne'e, pelumenus ami trata hotu lei sira ne'e, balun ne'ebé la konsege ami sei husik hela ba 2022”, esplika nia.
Dadauk ne’e Komisaun A hala'o hela diskusaun no aprovasaun espesialidade kona-ba Projeto Lei Númeru 21/V/(3a) - Lei Majistrados Judisiais, Projeito Lei Númeru 23/V/(3a) - Lei Estatuto Ministério Público no Proposta Lei Númeru 24/V(3a) - Lei Estatuto Ministério Público, iha Munisípiu Manufahi.
Aleinde Komisaun C no D dadaun hala'o hela diskusaun no aprovasaun espesialidade ba PPL Númeru 27/V (3a)-Lei Enquadramento Orsamentu Jerál Estadu no Jestaun Finanseira Públika, iha Sentru Formasaun Tibar. (*)