By: Isac
Tempotimor (Dili) – Deputadu Bankada Congreso Nasionál Reconstrução Timorense (CNRT) nu'udar bankada Governu, optimista maka'as katak Prezidente Repúblika, Francisco Guterres Lú Olo sei promulga proposta lei haat, ne'ebé Parlamentu Nasionál (PN) entrega ona ba PR.
"Lei hirak ne'ebé ami aprova hodi haruka ba ne'ebá ne'e, interesa nasaun nian. La'ós interese poder Aliansa Mudansa ba Progressu (AMP) nian ka ne'e, lae. Ne'e interese nasionál, soberania estadu," dehan deputadu bankada CNRT, Patrocino Fernandes iha PN, Tersa (06/08/2019).
Deputadu ne'e optimista tebes ba proposta lei ne'ebé iha ona PR nia liman, sei hetan promulgasaun. "Ha'u optimista teb-tebes katak PR sei promulga. Tanba PR ne'e ema gerilleiru ida, veteranus boot ida, tanba ne'e ha'u optimista nia sei promulga," dehan Patrocino.
Nia afirma, bainhira ko'alia katak PR la promulga, ne'e pesimista liu. "Dehan la promulga ne'e pesimista demais, tanba ne'e la'os asuntu AMP nian. Asuntu povu tomak, asuntu estadu, nasaun soberania. Ne'ebé, ba ha'u ida ne'e haree katak ha'u optimista teb-tebes PR sei promulga," nia afirma tan.
Hanesan ita hatene, Parlamentu Nasionál (PN) aprova ona Proposta Lei 4 no rezolusaun ida ne’ebé deputadu FRETILIN sira vota kontra total iha loron 23 fulan Jullu liubá.
Proposta Lei haat (4) mak hanesan; Proposta Resolusaun ho Número 2/V (1a) kona-ba ratifikasaun tratadu entre Timor-Leste ho Australia, ne’ebé estabelese respetivas Fronteira Maritima iha Tasi Timor, Proposta Lei Número 4/V (1a) – alterasaun daruak ba Lei Número 13/2005, 2 Setembru kona-ba Lei Atividade Petrolifera (LAP) hetan votu afavor 41, kontra 23 abstensaun ida hosi deputadu PD, Adirano do Nascimento, proposta Lei Número 5/V (1a) – alterasaun daruak ba Lei Número 9/2005, 3 Agostu kona-ba Lei Fundo Petroliferu hetan votu afavor 41, kontra 23, no abstensaun ida hosi deputadu PD, Adriano do Nascimento.
Entretantu, proposta Lei Número 6/V (1a) – Alterasaun dahuluk ba Lei Número 8/2008, 30 Juñu kona-ba Lei Tributaria, no alterasaun dahuluk ba Lei Número 3/2003, 1 Jullu kona-ba Tributasaun Kontratantes de Bayu Undan, alterasaun dahuluk ba Lei Número 4/2003, 1 Jullu kona-ba Dezenvolvimentu Petróleu Tasi Timor (Estabilidade Tributária) hetan votu afavor 42, kontra 23 no abstensaun mamuk, no ikus liu mak poposta Lei Número 7/V (1a) kona-ba Rejime Laboral no Migratoriu Espesial Aplikavel ba Projetu Bayu Undan ho votu afavor 42, kontra 23 no abstensaun mamuk.