“Ho Governu nia naran husu ba komunidade sira tenke iha kooperasaun di'ak ho Xefe Suku no Xefe Aldeia nomós tenke kooperasaun di'ak ho parte tékniku husi MAPKomS nia ne'ebé sei mai atu halo instalasaun sistema DTMT iha ne'e ho di'ak, tanba ita-nia kooperasaun ne'e importante tebes”, dehan Ministru Francisco Martins, bainhira sensibiliza informasaun iha sede Suku Motael, sesta (13/08).

Tanba ne’e, hakarak iha kooperasaun di'ak bainhira prosesu instalasaun sistema DTMT ne'e la’o, Governu lakohi iha dezentendementu ba prosesu hirak ne'e.

 “Dalabarak ita hakarak, maibé to’o tiha mai, ita komesa foti fali ona kestaun oioin, no hamosu ezizensia mak barak liu fali, maibé tempu ida ne'e ha'u hakarak ko'alia ho ita-boot sira, nune'e ita bele fó rezultadu di'ak ba instalasaun sira ne'e”, dehan nia.

Husu mós ba komunidade no entidades sira iha Motael hodi entende didi’ak katak programa instalasaun ne'e ba komunidade sira hodi bele asesu informasaun iha nível nasionál no internasionál.

“Ami mai ko'alia ho ita-boot sira, husu ita-boot sira atu intende katak ida ne'e di'ak ba ita-nia komúnidade sira, la'ós ba ita sira ne'ebé hanesan lideransa, tanba komunidade presiza informasaun no asesu ba informasaun kualquer de'it la presiza hasai kustu tanba ne'e ami mai ko’alia ho ita-boot sira antes mai halo instalasaun”, esplika nia.

Luis António Viegas, nu'udar Autoridade lokál kompremetidu sei la mosu dezentendimentu bainhira prosesu instalasaun sistema DTMT ne'e la’o

“Antes ne'e mós ami hahú tama sai ona hodi informa ba komunidade sira relasiona ho programa ida ne'e, no komúnidade sira aseita ne'e mak ohin loron ita hotu marka prezensa iha ne'e hodi halo sensibilizasaun iha Motael”, hatete nia. (*)