Tempotimor (Dili) – Primeiru Ministru Taur Matan Ruak afirma, tanba nesesidade nasaun, Orsamentu Jerál Estadu (OJE) tinan 2020, prevé biliaun 1.6 dollares Amérika.

"Foin daudauk, ami halo tiha jornada orsamentu nian, tetu no aprezenta tiha ona biliaun 1.6 dolares Amérika. Iha loron hira tan sei fahe ba ministériu sira para liuhosi ida ne'e, sira bele halo ajustamentu, para lori ba komisaun revizaun orsamentu," dehan PM Taur Matan Ruak iha Palásiu Prezidensiál Bairru-pite, Kinta (08/08/2019).

 

Entretantu, relasiona ho OJE 2020 ne'ebé Governu aprova iha Konsellu Ministru (KM) loron 31 Jullu 2019 ho valór biliaun 1.6 halo bankada Fretilin preokupa. Tanba OJE tinan 2020, tuir deputadu bankada opozisaun, boot liu kapasidade Governu.

 

"Proposta OJE 2020 ne'ebé Governu prepara daudauk ne'e, boot liu kapasidade ezekusaun Governu nian. Tetu orsamentu tinan ida ne'e (2020) boot. Maibé, Governu la tetu ho sira nia kapasidade ezekusaun. Tanba, ita haree OJE 2019 ho totál biliaun 1.4, to'o fulan Agostu nia ezekusaun foin mak 46% de'it. Signifika katak sira (Governu) laiha kapasidade atu halo ezekusaun," dehan deputada Maria Angélica Rangel da Cruz dos Reis, Tersa (06/08/2019) iha Parlamentu Nasionál.

 

Hatán ba preokupasaun ne'e, PM afirma, razaun tanba nesesidade no prioriedade estadu nian. "Ita haree ba ita nia nesesidade no prioriedade ho rekursu ne'ebé ita iha. Ita hanoin iha númeru ida, valór ida razoavel ba ita nia ekonomia, ita hakarak kresimentu sa'e oituan target Governu nian pursentu 7%. Ita ho $ 1.4, $ 1.6 mai kraik ita la to'o pursentu 7%. Sa tán ita nia ekonomia ne'e osan estadu mak maka'as," esplika TMR

 

PM Taur rekoñese, seitór privadu sira iha rai laran mós komesa investe ona. Maske, tuir PM seidauk barak.