Tempotimor (Dili) - Eis Prezidente Rejiaun Administrativu Espesial Oe – Kusi Ambeno (RAEOA), atual Sekretariu Jeral Partidu FRETILIN, Mari bin Amude Alkatiri halo ameasa forte ida ba dirijentes, lideransa partidu inklui deputadu opozisaun sira ne’ebé karik deklara apoiu governu no maioria iha Parlamentu Nasionál hodi hatama surat rezignasaun bainhira la kumpri nia orden.
"Ha'u só bolu atensaun ba kuadrus dirijente sira, membru Comite Central sira, membru komisaun polítika, iha FRETILIN, bainhira Comite Central ka órgaun FRETILIN nian, foti desizaun dehan dalan mak ida ne'e, ita tenke tuir dalan ne'e. Sira be ha’u akompaña dadauk, ha’u Sekretariu Jeral akompaña dadauk be la tuir dalan ida ne’e, ha’u sei konvoka fali Komisaun Politika, ha’u sei konvida sira atu rezigna a’an. Ne’e ha’u hatete ona,” diskursu Alkatiri iha konvíviu popular iha CCF, Komoro – Dili, Sabado (03/08).
Relasiona ho ameasas husi Sekretariu Jeral Partidu FRETILIN, Mari Alkatiri ne'ebe Governu AMP rejeita atu fo nafatin kna'ar ba nia nu'udar Prezidente RAEOA ne'e, eis deputadu FRETILIN, Osorio Florindo da Costa hakerek sadik iha Facebook ho ID Ososrio Costa iha loron Segunda (05/08) tuku 13:21 OTL.
“O pecat ida, signifika pecat atus 1, seidauk atus 1 ninia familia mós hanesan o pecat ht. Brani pecat tok sadik. Pecat malu rame,” hakerek ID Facebook Osorio Costa atual eis deputadu Osorio Florindo da Cota.
Eis deputadu FRETILIN hosi Ponta Leste ne’e nia públikasaun iha Facebook hetan komentariu barak hosi nia kamarada FRETILIN atus rua resin no maioria la simu ameasa Alkatiri nian.
Eis Vise Ministru Saúde iha governu minoritaria, Luis Lobato mós kontra no lamenta tebes ho ameasa Alkatiri nian.
“FRETILIN ne’e frente no organizasaun politika ne’ebé boot ho nia kuadru no militante sira. FRETILIN la’ós kompañia privado para pecat malu. Militante no povu mak terus tanba naran FRETILIN iha funu tinan 24 nia laran, la’ós lideransa mak terus. Pecat kuadru FRETILIN la’ós dalan ne’ebé di’ak atu hametin di’ak atu hametin no haburas FRETILIN,” komenta Luis Lobato.
“Ita ko’alia habelar inkluzaun ita atu pecat malu fali. Lalika hanoin pecat ida iha FRETILIN nia laran. Fundador duni, maibé miliante no kuadru sira mak terus tanba naran FRETILIN. Viva FRETILIN, Viva militante, no Viva kuadru FRETILIN sira hotu,” afirma Luis Lobato.
Nune’e mós ID Facebook Aquito Moro esplika, baibain sira komunga tiha ona FRETILIN ne’e la’ós ema id aka grupu ida nian.
“FRETILIN ne’e povu tomak nian. Ne’ebé atu desidi buat ruma ne’e, desijaun tenke koletivu,” hatete Aquito.
Husi Hakerek eis deputadu Osorio ninian iha facebook ne'e hamosu movimentu pro no kontra hasoru diskursu ameasas husi Sekretariu Jeral Partidu FRETILIN, Mari Alkatiri ninian iha (03/08) iha CCF.
