“Foin lalais, ha’u rasik ho Vise Prezidente Parlamentu Nasionál mak foti iha Parlamentu, katak atu halakon polemika ida ne'e, di'ak liu KAK tun ona, karik iha evidénsia ruma, KAK entrega ba Ministériu Públiku hodi prosesa ba tribunál. Karik iha evidénsia ruma, maibé labele rona CNRT”, hatete Olinda ba www.tempotimor.com liuhusi telefone, kinta (19/8).

Tanba, buat ne'ebé mosu, dala los mós bankada CNRT dehan sala, tanba CNRT lakon poder ona, ne'ebé sira ko’alia avontdade.

Ba kazu Ró Tranship II Gresik, karik Komisaun Anti Korrupasaun identifika evidénsia konkretu bele aprezenta ba Ministériu Públiku atubele submete ba tribunál.

Maibé, realidade to’o agora bankada KHUNTO rasik seidauk hatene erru ruma iha Ministériu Transporte Komunikasun, tanba kazu ne'e parte investigadór sira mak hatene no la'ós deputadu sira.

Ho kazu ne'ebé akontese, Bankada KHUNTO hakarak deklara katak Korrupsaun ne'ebé mak uluk tinan 10 liuba komete husi deputadus no membru Governu balun, to'o agora prosesu to'o ona ne’ebé.

Antes ne'e Deputadu Bankada CNRT, Domingos de Carvalho hatete, Ministru Transporta no Komunikasaun (MTK), José Agustinho da Silva no Diretór Diresaun Nasional Kaputajen Ró Nakroma, inklui Diretór Diresaun ba Transporte Marítima tenke responsabiliza kazu kontratu Ró Tranship II Gresik.

Tanba, Ró ne'e tama mai iha Timor-Leste, hetan asinatura husi ema hirak ne'e, maibé labele kaer de’it ida no husik sira seluk livre.

“Ha’u hatene katak problema ne'e bele rezolve, e la'ós diretór nakroman mesak mais tenke mós ministru toma responsabilidade e ba filafali diretór transporte marrítima mós tenke toma responsabilidade ba ida ne'e”, dehan nia. (*)