Tuir munitorizaun lalenok ba ema hotu iha fatin hothotu katak, Governu kria situasaun ida ne'ebé diferente e halo deskriminasaun iha fatin lubuk ida.

"Ita bele haree katak, ema sira ne'ebé lori kareta boot husi Dili ba Baukau, husi Dili ba Bobonaro barak la halo sira-nia viajen maibé iha Dili reativa atividade balun, taxi ho mikrolete buat hotu bele la'o, ne'e diskriminasaun boot ba sira ne'ebé depende tula pasajeiru sira", dehan Diretur Ezekutivu Lalenok Ba Ema Hotu (LABEH), Christopher Henry Samson iha Kampung Baru, kuarta (25/08).

Iha prosesu ida ne'e rona mós informasaun katak, Delta mós tama ona iha Timor-Leste, maibé hamosu konfuzaun, tanba la hatene moras refere tama husi ne'ebé.

"Ita hein nafatin informasaun ne'ebé kredivel husi Ministra Saúde atu hatete loloos maibé Ministra Saúde deklara katak delta tama iha Timor tanba ema balun husi Ermera ba halo negósiu ilegál iha fronteira sira mak lori mai", dehan nia.

Husu Ministra Saúde aprezenta ema ne'ebé ba halo negósiu ilegál iha fronteira, bainhira Governu la indentifika didi'ak ema Moras sei da'et ba bebeik.

"Tanba ida ne'e ita husu ba Ministra favor ida indentifika sira ne'ebé ba hola sasán ilegal atu aprezenta sira lori ba izolamentu atu bele kumpri protokolu ne'ebé iha, de la'e la bele dun malu", afirma nia.

Se la aprezenta sidadaun ilegal ne'e ofende populasaun tomak tanba fronteira iha Timor la'ós de'it iha Bobonaru Batugade maibé iha fronteira Suai, Atauru no Viqueque

Ho situasaun ida ne'e LABEH husu ba Governu la bele fó imajen ba públiku katak Covid-19 delta ne'e la'ós problema seluk ne'e problema boot ba kalamidade saúde públika nian.

Tanba ne'e, fronteira taka totál tanba nasaun barak halo nune'e, la bele fó imajen atu ema tama sai lori moras, tama lori moras sai lori moras ilegalmente. (*)