Konsellu Ministrus aprova ona projetu Dekretu-Lei iha loron 21, fulan-jullu, tinan 2021, ba kriasaun apoiu finanseiru ba kazu mate ka inkapasidade tanba rezultadu husi inokulasaun ho vasina kontra COVID-19.

Maske risku husi efeitu sekundáriu grave ne’ebé provoka husi vasina kontra COVID-19 ki’ik tebes, ne’ebé kompensa maka'as tebes ho benefísiu husi vasinasaun ba populasaun einjerál, ho ninia efikásia ne’ebé komprova ona atu prevene kazu gravé no mate, Governu deside ho diploma ida-ne’e prevene situasaun, exesionál loos, iha ne’ebé ninia efeitu sekundáriu sira gravé liu, hodi prevee kompensasaun loloos ba ema ne’ebé hetan efeitu sekundáriu hirak ne’e.

"Projetu Dekretu-Lei ne’e haruka tiha ona ba Prezidente Repúblika ninia apresiasaun iha loron 29 fulan-jullu no sei hein promulgasaun", informa Ministru Prezidénsia Konsellu Ministru, Fidelis Leite Magalhães, liuhusi karta komunikadu ne'ebé www.tempotimor.com asesu, kuarta (01/09).

Dekretu-Lei ne’e define katak iha kazu inkapasidade ki’ik liu 30% ne’ebé provoka husi vasina kontra COVID-19 sei atribui kompensasaun ida ho valór dolar amerikanu rihun ida, karik inkapasidade ne’ebé iha husi 30% to’o 70% sei atribui valór dolar amerikanu 2100 no iha kazu vasina provoka inkapasidade boot liu 70% sei atribui dolar amerikanu rihun 7.

"Iha kazu mate ne’ebé bele akontese tanba simu vasina, sei atribui kompensasaun ida ho valór dolar amerikanu rihun sanulu", esplika nia.

Verifikasaun ba situasaun mate nian ka inkapasidade no ninia relasaun ho vasina kontra COVID-19 sei hala’o liuhusi avaliasaun médika no Ministériu Saúde mak sei responsável ba rekoñesimentu direitu apoiu ne’e nian.

"To’o agora Ministra Saúde seidauk konfirma ka informa Konsellu Ministrus kona-ba kazu ruma, ne’ebé komprova ona, husi mate ka efeitu segundáriu gravé katak provoka husi vasina hasoru COVID-19", dehan nia.

Bainhira, iha kazu komprovadu ruma, maske seidauk promulga Dekretu-Lei ne’e, Ministériu relevante sira, tuir orientasaun Konsellu Ministrus no Primeiru Ministru nian, tenke halo intervensaun hodi providénsia apoiu ba vítima sira. (*)