"Bankada FRETILIN haree asuntu ida-ne’e preokupante tebes ba soberania Estadu Repúblika Demokrátika Timor-Leste nian, bainhira krime organizadu envolve membru Instituisaun Estadu nian", dehan Xefe Bankada Fretilin, Francisco Miranda Branco iha Parlamentu Nasionál, kuarta (08/09).

Durante ne'e, krime organizadu akontese tanba hamosu husi grupu ida estruturadu ne’ebé eziste tempu balun ona, komete infrasaun gravé ruma ho intensaun atu direta ka indiretamente, hetan benefísiu ekonómiku ka materiál.

Tanba ne'e nu’udar espésie podér paralelu ida, ne’ebé okupa lakuna ka frajilidade sira ne’ebé Estadu hasoru mak envolve to’o Instituisaun Estadu nian ona, koloka ‘em causa’ ba Soberánia Estadu no kondena futuru labrik oan no beioan sira-nian.

"Krime Organizadu (nasionál, rejionál ka trans-nasionál) iha tipifikasaun oioin, husi tráfiku droga, kontra-bandu ba kilat no terrorizmu, husi korrupsaun iha administrasaun públika, fraude finanseira no fraude fiskál, husi tráfiku internasionál ba feto sira, labarik no adolesente sira, brankeamentu kapitál no falsifikasaun ba ai-moruk, no seluk-seluk tan", informa nia.

Enkuantu, iha aprezentasaun relatóriu anuál husi Prokuradoria Jeräl Repúblika (PGR) relata kona-ba frekuénsia kazu sira ne’ebé hetan investigasaun, Timor-Leste sai nu’udar ‘ponto de tránzitu’ ba droga no ba brankeamentu kapitál.

Ho ida ne’e, Bankada FRETILIN louva Primeiru Ministru, Taur Matan Ruak, nia inisiativa atu koloka Forsa Armada iha fronteira, nu’udar medida dahuluk hasoru krime organizadu, no rekomenda atu redobra mós atensaun iha aeroportu no portu sira.

Tanba, Primeiru-Ministru Taur Matan Ruak nia intervensaun iha plenária Parlamentu Nasionál kona-ba pedidu renovasaun ba deklarasaun Estadu Emerjénsia ba dala XVI, hodi hatán ba deputadu sira hatete katak, “kestaun kontrolu fronteira no ‘pasajen ilegál’ 98% hanesan krime organizadu, no situasaun ida-ne’e akontese tempu naruk ona, tanba envolve husi pesoál polísia balun no indivídu, veteranu balun. (*)