Tanba joven sira ne'ebé iha suku Mulo mak sei tuir formasaun no sira rasik sei hala'o atividade nune'e husu atu kuidadu no aproveita, tanba joven sira mak sai sentru ba dezenvolvimentu iha futuru.
"Atu garante de'it ba joven sira, ho estabelesimentu sentru formasaun ne'e husu ita-boot sira atu aproveita didi'ak no kuidadu sentru formasaun ne'e, nune'e programa sira ne'e nafatin iha nia kontinuidade", dehan Francisco Martins, bainhira halo lansa Programa Naroman ba Suku, iha suku Mulo, tersa (07/08).
Programa Naroman ba Suku iha área MAPKomS nia ne'e oinsá fó formasaun ba joven sira iha suku, nune'e halo naroman komunidade nia hanoin iha suku kona-ba dezenvolvimentu ne'ebé la'ó iha rai laran.
Governu nia hakarak, lori dezenvolvimentu konsentra iha povu, tanba povu mak sai na'in ba dezenvolvimentu, nune'e hein katak sentru formasaun iha suku Mulo ne'e bele habelar liután mós oinsá mak atu halo kombate ba propagasaun Covid-19 iha rai ida ne'e.
Entretantu MAPKomS Kompremetidu sei nafatin fó asisténsia ba programa naroman ba suku, iha suku Mulo.
Joventude Suku Mulo, Estevanos Magalhães hatete, nia parte prontu tuir formasaun ne'e ho di'ak hodi bele ajuda Governu atu fó informasaun ba ninia komunidade sira iha suku refere.
Maibé husu ba parte kompaña telekomunikasaun sira hodi bele ajuda sira iha rede internet inklui liña eletrisidade, tanba iha suku refere dezaraska ba liña eletrisidade inklui rede internet.
"Kontente tebes ba programa naroman ba suku ne'e, maibé husu ba kompaña telekomunikasaun,atu ajuda ami liuhusi liña internet, nomós husu ba Governu atu haree mós ba liña eletrisidade tanba iha suku Mulo rasik komunidade seidauk asesu hotu liña eletrisidade, nune'e sei difikulta sira atu asesu tuir formasaun", dehan nia. (*)