"Bankada Partidu Demokrátiku mós hato’o nia apresiasaun ás ba esforsu extra-ordináriu hosi líder polítiku sira iha Parlamentu Nasionál, iha Governu no Prezidente Repúblika, ne’ebé hatudu nafatin lideransa nasaun, iha situasaun ne’ebé difísil teb-tebes", dehan Deputadu PD, Adriano do Nacimento, iha plenária PN, kuarta (15/09).
Tanba, situsaun difísil hanesan impasse polítiku no Covid-19 ne'ebé laiha serta atu lakon, inklui siklone seroja (inundasahn) ne'ebé la espera atu harahun infra-estrutura nasaun nian, no resesaun ekonómika ne'ebé povu no nasaun monu, maibe líder husi orgaun soberanu sira, hamutuk nafatin hodi halo ajustamentu ba moris povu no nasaun ho problema hirak ne'e.
Tanba ne'e, Partidu Demokratiku espera líder no liderasa sira husi orgaun soberanu estadu nian, sei la mout ho situasaun atual ne'ebé mak afeta ba povu Timor-Leste.
"Bankada Partidu Demokrátiku fiar katak, líder no lideransa nasaun, sei la mout ho problema hirak ne’e. maibé ho problema hirak ne’e, mak bele hamosu mós kualidade lideransa, unifika pensamentu no asaun hodi tau interesse povu no nasaun nian, ás liu interesse pesoál no grupu”, afirma nia.
Bankada PD, husu ba líder polítiku sira iha nasaun ne’e, atu hamutuk hodi unifika sira-nia pensaun no asaun, hodi hari Timor foun ida, ba Timoroan hothotu, mai husi hun ida, abut ida, iha Timor-Leste ida de’it.
Ba prinsípiu no objetivu ida ne’e, PD husu baGovernu nu’udar jestór ba governasaun nasaun, atu aselera kria uma ba refujiadu sira nebé sei hela iha lona okos tanbá impaktu husi siklone seroja.
Rekomenda ba Governu atu implementa ona polítika rekoperasaun ekonómika, hodi ajuda povu sira ne’ebé deve hela instituisaun finanseira hodi fila liman hanesan fa’an obralan, modo no seluk-seluk. Maibé husu atu selu ona osan ba frontline sira, nebé to’o agora balu seidauk simu sira-nia direitu.
Aleinde, husu Governu tenke halo lalais vasina ba povu iha Timor laran tomak, tamba transmisaun Covid-19 deskontroladu ona iha rai laran. Nune’e mós aplika konfinamentu domisiliáriu ruma, tenke fó subsídiu ka fó osan ba povu sira nebé laiha rendimentu fixu, atu sira bele hatutan sira-nia moris loroloron. (*)
