FRETILIN Apoiu Lú OloTaur Kombate Covid-19 no Korrupsaun

Xefe Bankada FRETILIN, Francisco Miranda Branco. Xefe Bankada FRETILIN, Francisco Miranda Branco. Foto Suplay

Tempotimor (Dili)-Bankada Frente Revolusionariu Timor-Leste no Independente (FRETILIN) iha Parlamentu Nasionál (PN) apoiu  Prezidente Repúblika (PR), Francisco Guterres ‘Lú Olo’ ho Primeiru Ministru (PM), Taur Matan Ruak ne’ebé sériu no konviktu hodi kombate pandemia Covid-19 nomós krime korrupsaun iha rai laran.

Xefe Bankada FRETILIN, Francisco Miranda Branco, deside reitera apoiu inkondisionál ba PR Lú Olo ho Primeiru Ministru, Taur Matan Ruak atu kombate hasoru virus Covid-19, no krime organizadu korrupsaun ho sériu.

"Bankada Fretilin reitera apoiu inkondisionál ba S. Excia. Primeiru Ministru VIII Governu Konstitusionál, Taur Matan Ruak ho Sua Excelência Prezidente Repúblika, Francisco Guterres Lú olo, ne’ebé sériu no konviktu iha kombate hasoru vírus Covid-19, sériu no konviktu mós iha kombate hasoru korrupsaun no krime organizadu", dehan nia iha plenária PN, kuarta (15/09).

Pozisaun Fretilin mós haree katak, krime Organizadu (nasionál, rejionál ka transnasionál) iha tipifikasaun oioin, husi tráfiku droga, kontra-bandu ba kilat no terrorizmu, korrupsaun iha administrasaun públika, fraude finanseira no fraude fiskál, tráfiku internasionál ba feto sira, labarik no adolesente sira, brankeamentu kapitál no seluseluk tan.

Iha aprezentasaun husi relatóriu anuál ba Parlamentu Nasionál, filafila ona maka Prokuradór Jerál República (PGR) relata katak bazeia ba frekuénsia kazu sira ne’ebé hetan investigasaun, Timor-Leste sai nu’udar ‘ponto de transito’ ba droga no brankeamentu kapitál.

Maibé Bankada FRETILIN nia preokupasaun mak krime organizadu tanba nu’udar espésie podér paralelu ida, ne’ebé okupa lakuna ka frajilidade sira ne’ebé Estadu hasoru, mak envolve to’o Instituisaun Estadu nian, hodi koloka ‘em causa’ Soberania Estadu no kondena futuru jerasaun sira tuir-mai.

Tanba Timor-Leste seidauk iha lejislasaun espesífika ba krime organizadu, maibé tanba adota Convenção Nações Unidas (UNCAC) nian ba kombate korrupsaun, Timor-Leste aprova ona lejislasaun ba brankeamentu kapitál no lei anti-korrupsaun.

Bankada FRETILIN komprometidu halo esforsu hotu durante V Lejislatura atu prodús ‘ferramentas legais’, hodi reforsa Órgaun Ezekutiva iha kombate ba proliferasaun krime organizadu iha Timor-Leste.

"No ohin duni ami deputadu lubuk ida husi bankada oioin, aprezenta ba meza Parlamentu Nasionál Projeto de Lei de Organização da Investigação Criminal, Atu kombate krime organizadu, institusionalizadu”, hatete nia.

Nune’e husu sidadaun hotu presiza onestidade, presiza seriedade, presiza konsisténsia no hala’o ‘boa governação’ hametin kooperasaun internasionál (INTERPOL), nomós komunikasaun Institusionál permanente entre Órgaun Soberania sira ba asuntu importante ida-ne’e.

"Presiza asegura servisu hamutuk instituisaun relevante sira hanesan Ministériu Públiku, PCIC, PNCIC, CAC, Forsa Defeza no Seguransa, Serviços Inteligência no Serviços de Informação, no seluseluk tan”, afirma nia. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« November 2021 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30          

Tempo Timor Networks

Online Counter