"Kona-ba informasaun nebé la'o hela iha públiku nia let, katak Maun Boot Kay Rala Xanana Gusmão ka katak Partidu CNRT rasik, apoia daudauk ona ka sei apoia kandidatu balun, Komissaun Politika Nasionál, husi Partidu CNRT, mai deklara, iha ne'e, katak buat né hotu la loos no mesak lian falsu", dehan Vise Prezidente, iha Sede Nasonál Partidu CNRT, Bairro dos Grillus, esta (17/09).

Tanba ne'e situasaun polítika atual, membru sira husi Konferénsia Nasionál Partidu CNRT sei reune, iha oportunidade ne’ebé los, ho hanoin atu deside kona-ba kandidatu ne’ebé Partidu sei apoia iha Eleisoens Prezidensiál.

"Nu'udar Partidu polítiku ida, CNRT defende katak tenke tuir didi’ak regra ne'ebé prevé ona iha ninia estatutu, tan ne'e hakarak informa ba públiku em jerál no ba militante Partidu nian, em partikular, katak Partidu, liuhusi ninia orgaun másimu, ne'ebé hatúr ona iha ninia Estatutu, sei hasai desizaun ruma, iha tempu ne'ebé oportunu, kona-ba kandidatu ida ne'ebé maka Partidu sei fó ninia apoiu polítiku tomak, ho missaun atu salvaguarda Estado de Direito Demokratiku, tuir sáida mak hakerek ona iha Konstituisaun RDTL-nian", hatete nia.

Maibé Komisaun Politika Nasionál mós fó hatene ba públiku katak, Partidu CNRT seidauk no sei la orienta kualker partidu ida atu lori fali Prezidente Partidu CNRT nia naran hodi fó apoiu ba partidu sira ne’e. (*)