"Ne'ebe karik audénsia orsamentu jerál estadu ida agora, Komisaun E Infraestrutura sei aprezenta preokupasaun ida ne'e, para bele tau iha orsamentu tinan oin mai", deklara Membru Komisaun E deputadu Marito Mota iha PN, sesta (17/09).

Tanba, tuir autoridade sira katak, Mota Loes ne'e iha tinan-1991, nia luan la to'o 900 metru, maibé agora dadaum ne'e nia luan kuaze kilometru (km) rua liu ona.

Bainhira preokupasaun ida ne'e Governu la atende, no tinan 2021 mak inundasaun ne'e bebeik, sei afeita, ba komunidade lubuk ida nia uma, eskola, inklui klínika.

Iha tempu uluk, transmigrasaun Indonézia nian, uma hamutuk atus-rua mak okupa iha ne'eba, no kada uma-ka'in ida, sira-nia rai ektare ida ho balun, maibé agora laiha hotu ona tanba impakru husi mota.

"Siknifika ita soma katakrai ektare hira mak lakon tiha ona, ita hatene katak Loes ne'e rai ida produtivu teb-tebes, ita ko’alia produ lokál ita presiza asegura e salva rai ida ne'e”, hatete nia.

Maske situasaun ne'e, Xefe Suku Guiso no Lisadila hato'o ona ba Governu, inklui hasoru ona Ministeriu Obras Publik, no Gabinete Primeiru Ministru (PM) maibé sira seidauk hetan resposta.

"Tanba ida ne'e mak sira hakarak, atraves da komisaun E asuntu infraestrutura, atubele reforsa liu sira-nia preokupasaun ida ne'e, tanba sira hatete katak sé la atende tinan ida ne'e inundasaun ne'e bebeik, ne'e sei afeita tomak, ba eskola, ba klínika e ba komunidade nia uma lubuk ida iha ne'ebá”, esplika nia.

Kona-ba kestaun inundasaun en-jerál ne'ebé akontese iha loron 4 fulan-abril, Governu lori duni orsamentu raktifikativu hodi aprezenta ba PN, tanba atu responde ba fatin sira ne'ebé idetifikadu ona iha teritóriu tomak, maibé la'ós prevé ba problema mota Loes.

"Tuir ami Komisaun E hatene katak, raktifikativu ne'e la prevé iha ne'eba. Ida ne'e mak sai preokpuasaun ba ami Komisaun E, no la sala semana oin ami sei halo fiskalizasaun ba iha suku rua ne'e”, dehan nia.

Enkuantu parte komisaun E ejize Governu atu aselera ona hari’i bairru foun ba vítima inundasaun. Tanba ho mudansa klimátika lanina, udan no anin boot ne'ebé sei mosu iha tinan ida ne'e, ba Timor-Leste sei afeta gravé liután inundasaun sira ne'ebé iha tinan 2020 no 2021.

"Ha’u hanoin katak, medida ne'ebé Governu foti, tenke atende ho emerjénsia, tenke lalais. Se la'e, buat balun ne'ebe ke estraga iha tinan kotuk e tinan ida ne'e ita seidauk hadi'a, mosu tán ida, e orsamentu sei bo'ot liután”, afirma nia. (*)