"Konsellu veteranu loloos nia ne'e independente no labele politiza aproveita oportunidade politiza tiha hotu tanba besik eleisaun ona. Ezemplu ida iha mós faktu ida hatudu, kalan boot lori formuláriu ne'e ba pesoál ida, dehan katak o rejistu ha’u hasa'e o nia durasaun Oito A Catorze anos (8-14) mais o tenke ser tama iha Partidu A, ida ne'e krime”, dehan Deputadu Fretilin, Fabião de Oliveira, iha plenária PN, segunda (20/09).
Dadauk Governu ho esforsu tomak ho konsellu veteranu, hodi verefika dadus veteranu sira ne'ebé rejistu, no tinan 2003 nian agora hotu ona, balun simu ona, maibé sira ne’ebé mak rejistu iha tinan 2009 mak agora iha hela faze verifikasaun.
Maibè bankada FRETILIN deskobre katak iha prosesu verifikasaun ne'e hamosu diskriminasaun boot, tanba pesoál balun ne’ebé envolve iha servisu ida ne'e mak politiza situasaun.
Bankada Fretilin hakarak foti ezemplu balun iha RAEOA, prosesu verifikasaun ba dadus veteranu ne'e kria de'it diskriminasaun tanba besik ona eleisaun.
Iha prosesu ne'e sira ba kalan boot iha veteranu sira-nia uma, hodi haruka veteranu sira atu vota ba sira-nia partidu mak foin bele rejista veteranu sira-nia grau hodi bele hetan pensaun.
Nu’udar reprezentante povu, bankada FRETILIN hakarak husu Sekretariu Estatu ba Asuntu Veteranu, atu halo investigasaun klean ba kazu ida ne'e.
Ba kazu ida ne'e, deputadu seidauk hatene iha Munisípiu seluk oinsá, maibé konserteza kazu ida ne'e foin mak deteta iha RAEOA de'it.
Tanba ne'e, presiza halo investigasaun ba ida ne'e, tanba hothotu hatene katak hari’i konsellu veteranu iha nasionál ho munisípiu ne'e, tenke veteranu ho independente, hodi halo verifikasaun ba asuntu veteranu ho loloos, maibé la'ós uza oportunidade atu politiza.
"Ha’u espera katak ba oin sei labele akontese tán”, nia espera. (*)