Print this page

FRETILIN 'Lakohi' Mídia Akuza Taur ho Mari Hamosu Krize 2006

By September 21, 2021 2586
Prezidente Partidu Libertasaun Popular (PLP), Taur Matan Ruak (karuk) hakuak malu ho Sekretariu Jeral Partidu Fretili, Mari Alkatiri (los), iha momentu balun liuba. Prezidente Partidu Libertasaun Popular (PLP), Taur Matan Ruak (karuk) hakuak malu ho Sekretariu Jeral Partidu Fretili, Mari Alkatiri (los), iha momentu balun liuba. Foto Suplay

Tempotimor (Dili)-Bankada Frente Revolusionáriu Timor-Leste no Independente (FRETILIN) iha Parlamentu Nasionál (PN) rejeita ho informasaun ine'ebé pesoál balun lansa ha Mídia Sosiál hodi akuza Prezidente PLP, Taur Matan Ruak no Sekretáriu Jerál Partidu Fretilin, Mari Alkatiri hamosu situasaun krize 2006, tanba informasaun ne'e laloos.

Deputada Fretilin, Josefa Pereira, husu mídia sosial ne’ebé kria husi partidu balun, se seidauk hatene karik lalikan interpreta tanba krize 2006 situasaun ida ne'e sensivel.

"Señor Prezidente ha’u hanoin katak krítika kona-bá governasaun e sujestaun, é normál, maibé lalika sukit fali problema ne'ebé sensivel teb-tebes iha 2006 nian, hodi hatete katak, sira na'in-rua mak hamosu, 600 militár ne'ebé sai husi F-FDTL. Tuir relatóriu husi TIM investigasaun internasionál, kona-bá akontesimentu kazu 2006, hatete loloos iha ne'ebá, sé loós mak autór ba kazu ida ne'e. Susar teb-tebes ba ita, sé ita la komprinde kona-bá situasaun sira ne'e, lalika foti", hatete nia iha Plenária PN, tersa (21/09).

Tanba ne’e, FRETILIN haree katak, kazu ida ne'e sensivel, maibé la lahatene, se majór Alfredo Reinaldo mak sei moris, sei ko'alia loloos kona-bá situasaun ida ne'e. Tanba ne’e husu atu utór sira ne’ebé lansa informasaun falsu iha mídia sosiál atu lalika lori kazu sensivél halo fali kampaña.

"Mídia ida ne'ebè hakerek buat ne'e lahatene, e gosta atu halo kampaña kona-bá situasaun ida ne'e, maibé nia lahatene katak buat ne'e sei afeta mós balu-balun", hatete nia.

Ho ida ne’e, husu ba públiku hakarak krítika Governu, tenke krítika ninia jestaun, ninia governasaun no tenke krítika ne'ebé ho loloos, maibé labele liga ba kazu 2006 nian.

Maske, iha mídia sosiál ne'e mós sita tan katak malisan mak babeur Primeiru Ministru, Taur Matan Ruak ho Marí Alkatiri hodi halo sira-nia ne'on lakon, hodi lahatene ukun.

Maibé FRETILIN hakarak hatete katak malisan ne'e babeur Prezidente partidu ida ne'ebé foin dadauk ne'e hamonu nia maluk veteranu, hodi vota kontra tiha Orsamentu Jerál Estadu (OJE) 2020.

"Tanbasá mak iha momentu ne'eba lakohi vota afavór ba Orsamentu Jerál Estadu, e no husik buat ida ne'e liu. Tanba saida, señor Taur Matan Ruak la'ós veteranu entaun iha ne'e veteranu ho veteranu hamonu malu maibé la suporta malu atu oinsá mak bele ukun ho di'ak, no la'o ho los", deklara nia.

Deputada Bankada CNRT, Maria Rosa "Bisoi", husu deputada Fretilin atu sita ema individu ka grupu sira ne’ebé halo politika sira iha baze.

"Sé ema individu ida mak hala'o nia polítika iha baze, temi tok mak ema individu ho grupu ga sé, labele temi to'o fali dehan katak Prezidente Partidu ne'ebé hamonu fali ninia maluk veteranu, Xanana nunka fó orden ba ema ida atu tun ba", hatete nia.

Tanba, nu’udar membru Komisaun Politka Nasionál, Partidu Congresso Nacional de Reconstrução de Timor (CPN/CNRT), bele kompara ho partidu FRETILIN bainhira nível altu CPN mak fó desizaun ne'e ninia, la'ós fó filafali ba ema tomak ne’ebé mak tun ba baze.

"Ida hamonu fali ninia maluk veteranu ne'e, deputada, ita-boot ko'alia sala, la hamonu ida mak agora dadauk tabele hela iha ne'eba ne'e. Nia ba husu ninia rejignasaun fila ba fila mai mós la monu ida, nafatin hela iha ne'eba", dehan nia.

Tanba ne'e, deputadu hakarak hatete CNRT nunka halo monu Governu, tanba ne'e tenke ko’alia buat ne’ebé lojika.

"Kona-bá 2006 ne'e fó todan ba sé ne'e, momentu ne'e sé mak ukun, Parlamentu to’o, fahe kilat ne'e, la'ós CNRT. CNRT foin mak iha, CNRT la'ós uluk kedas iha be fahe kilat ba petisionáriu hanesan ohin ita-boot temi ne'e, ne'e CNRT nia kilat ka, sé mak horibainhira iha ne'e afavór be sivíl kaer kilat hodi tiru malu ne'e", deklara nia. (*)

Rate this item
(0 votes)
Last modified on Tuesday, 21 September 2021 16:18
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items