"Lori nasaun Indonézia nia naran, ha'u hakarak hato'o adeus, katak, iha loron 1 fulan-outubru, ha'u sei hakotu ha’u-nia kna’ar, husi Prezidente Repúblika Indonézia", dehan Embaixadór Repúblika Indonézia (RI), Sahat Sitorus audénsia ho Prezidente Parlamentu Nasionál (PN), Aniceto Guterres iha Parlamentu Nasionál, kuarta (22/09).
Maibé espera ho embasadór foun ne'ebé sei delega husi Prezidente Repúblika Indonézia hodi mai Timor-Leste, sei hala'o nafatin espíritu kooperasaun entre Indonézia no Timor-Leste ho di’ak.
"Ha'u sei lakon Timor-Leste, ha'u-nia maun-alin no biin-alin sira, maibé sira seluk garante, ha'u-nia laran nafatin iha Timor-Leste, no ha'u fiar katak kooperasaun ida-ne'e sei kontinua ba prosperidade no bem-estar Indonézia nian", dehan nia.
Iha ne’e husu ba Prezidente Parlamentu Nasionál, Aniceto Longuinhos Guterres Lopes, atubele partisipa konferénsia Uniaun Interparlamentár (IPU) ne’ebé sei hala'o iha loron 20-24 fulan-marsu tinan 2022 iha Bali-Indonézia.
“Ha’u espera Prezidente Parlamentu Timor-Leste nian mós marka prezensa, e Ajenda mundiál ida-ne’e Prezidente Kámara Indonézia (Puan Maharani) konvida ona nia atu partisipa konferénsia iha Bali ne’e,” dehan nia.
Enkontru ba konferénsia mundiál IPU nian iha Bali, Indonézia mak sai uma na’in, tanba ne'e husu atu Prezidente PN atu partisipa.
Durante iha reuniaun entre Embaixadór Sahat Sitorus ho Prezidente Parlamentu Nasionál, mós konsege diskute kona-ba planu ba oin atu hasa’e kooperasaun entre parlamentu Timor-Leste ho Indonézia.
Embaixadór Sahat Sitorus mòs orgullu ho reuniaun entre Prezidente Parlamentu rai-rua nian iha Viena, Áustria tanba la’o ho susesu. (*)