Matebian mós nu'udar ex-Sekretáriu Komisaun Diretiva FRETILIN nian no atualmente Primeiru Vise Prezidente Partidu Congresso Nasional Reconstrução de Timorenses (CNRT).
"Lutu nasionál ne'e iha teritóriu tomak, ba periodu loron tolu, husi tuku 8:00 loron 25 fulan-setembru to'o tuku 07:59 loron 28 fulan-setembru. Durante periodu lutu nasionál bandeira nasionál sei hasa'e to'o ai-rin klaran de'it (meia haste), iha nasaun laran tomak iha fatin sira ne'ebé mak obrigatóriu tenke uza, inklui iha misaun diplomatika sira”, dehan Ministru Prezidensia Konsellu Ministru (MPKM), Fidelis Leite Magalhães ba jornalista sira iha palásiu Governu sesta (24/09).
Husi Lutu Nasionál ne'e Membru Governu hothotu mai hato'o Sentidu Kondolénsia liuhusi dada Bandeira to'o sorin klaran de'it (meia haste) , husi tuku 8:00 oras timor-leste (otl) ba Saudozu José António Gomes da Costa "Ma’huno Bulerek Karathayano", hakotu ona nia iis hodi temina peregrinasaun iha Mundu.
"Ho nune'e iha reuniaun ne'e nia laran sua eselénsia Primeiru Ministru Taur Matan Ruak ho nia membru Konsellu Ministru halo minutu silensiu ida hodi hanoin hikas kontribuisaun boot hirak ne'ebé ita labele temi hotu”, hatete nia.
Antes ne'e matebian pozitivu Covid-19 no halo tratamentu saúde iha Sala Izolamentu Ospital Lahane hafoin muda ba Hospital Nasionál Guido Valadares (HNGV), loron sesta (24/09/2021), tuku 16:00 liu oras timor-leste (otl) iha Hospital Nasionál Guido Valadares Eis Komandante hakotu iis. (*)