"Ami partidu KHUNTO, ami iha ne'e, ha’u nu’udar xefe bankada KHUNTO, ne'ebé konsilleru superior fó fi'ar mai ha'u atu kontrola ami na'in-lima iha ne'e, e ha'u sempre hatete ba sira labele ema ida sobu ita-nia plataforma", dehan nia iha Parlamentu Nasionál, sesta (24/09).
Tanba, partidu KHUNTO mai tur iha Parlamentu Nasionál ho objetivu atu serví povu, la'ós atu mai ka'er ukun.
"Ita labele hanoin uluk-uluk be hamonu Governu, sé mak tur iha Governu ne'eba, be ita atu halo monu. Ne'ebè ha’u sempre fó atensaun ba hau-nian kolega na'in-4 katak, kuandu halo deklarasaun ruma, ita ko'alia ba malu, hatete ba malu", dehan nia.
Nu’udar xefe bankada KHUNTO, sempre fó atensaun deputadu sira, karik atu hala'o deklarasaun políka ruma, tenke konsulta malu ho xefe bankada, atu nune'e evita liafuan balun ne'ebé mak la monu ba deputadu sira seluk nia iha laran.
Maske, ema barak kestiona partidu Fretilin viabiliza (tonka) Governu, maibé KHUNTO haree katak, Fretilin mós uluk tonka ona CNRT.
Tanba ne'e, husu ba sidadaun sira liliu deputadu husi opozisaun atu hamutuk hodi hala'o dezenvolvimentu no liuhusi Governu daualu to'o tinan 2023.
"Tinan 2023 mai mak, partidu ne'ebé manán laiha buat ida, ne'e dinámiku polítiku, partidu ne'ebé manán husik nia hala'o fali ninia ba, ida kaer Governu ne'e mak la di'ak ona, konformi ita-nia ema ne'ebé mak hili ita", hatete nia.
Tanba iha ne'e, deputadu sira bele ko'alia kona-ba povu ninia diretu, ko'alia deputadu nia kabun no uma laran mós povu mak sei julga iha kampaña, tanba kaer ukun mós sira promete ona buat barak, no povu mak sei sai sasin ba ida ne'e. (*)