“Timoroan nain 17, deskonfia membru grupu Persaudaraan Setia Hati Terate (PSHT). Sira tama ilegál iha área Indonézia,” hatete Xefe Imigrasaun Indonézia nian iha Atambua, Answar liuhosi liña telefone, Kuarta (21/08/19).
Answar hateten, ohin nia parte sei halo prosesu deportasaun ba Timoroan nain 17, liuhosi fronteira Mota Masin.
Adjunto Komisáriu PNTL, Komisáriu Mateus Fernandes ba Tempotimor.com hatete, PNTL simu ona informasaun kona-ba kazu ne'e, husi adidu Polísia Indonézia (POLRI) nian iha Díli.
“Sim. Ohin kedas adidu Polísia Indonézia (Polri) iha Embaixada Indonézia, informa ona katak ema sira ne'e laiha passaporte. Nune'e, parte imigrasaun Indonézia nian sei deporta fali mai Timor-Leste,” Mateus afirma.
Informasaun balu ne'ebé Tempotimor.com hetan asesu hatete, Timoroan hirak ne'e hamutuk nain 20. Maibé, nain tolu halai lakon. Ne'ebé, parte seguransa Indonézia kaer de'it sira nain 17.