Tempotimor (Díli) – Veteranu Manuel Soares 'Funu Lakan' husu Governu atu kontinua lori dezenvolvimentu ba área remotas hirak ne'ebé to'o ohin loron seidauk asesu ba dezenvolvimentu.
"Ha'u nia haree ba dezenvolvimentu ne'e iha klaran. Tanba uluk ne'e pior liu ida ne'e. Agora ita labele nega katak Governu la halo buat ida. Governu mós halo barak. Mas barak mós mak seidauk di'ak," dehan Veteranu Manuel Soares 'Funu Lakan' iha Kuartél Jenerál F-FDTL, Fatuhada, Tersa (20/08/19).
Veteranu ne'e mós husu Governu atu lori dezenvolvimentu báziku ba povu no veteranu sira ne'ebé iha área rurál.
"Ha'u husu ba Governu katak iha area rural ne'ebé mak bee seidauk iha, dada bee ba, iha ne'ebé mak eletrisidade seidauk iha, Governu tenke dada eletrisidade ba, estrada laiha Governu tenke halo estrada ba área rurál sira. Tanba, ema sira ne'ebé iha liu foho ne'ebá mak uluk liga malu ho FALINTIL. Ema sira ne'e la goza, goza mak iha sidade de'it," haktuir Funu Lakan.