“Asaun diplomátika, dezenvolve iha país ida-idak, tenke korresponde ba nesesidade interna ita-nia país. País investe iha diplomasia fatin ida razoavel husi orsamentu jerál Estadu. No sai óbviu katak ida ne’e ejize autór sira- diplomatas, fó enfaze ba Embaixadór sira atu kumpri sira-nia misaun”, hatete PR Lú Olo iha palásiu Prezidente Bairopite, sesta (08/10).
Tanba ne’e, Xefe Estadu fó posse ba Embaixadór Timor-Leste nian ba Reinu Tailándia, Juvêncio de Jesus Martins, Reino Béljika Jorge Trindade Neves de Camões, Repúblika Indonézia Filomeno Aleixo da Cruz, Repúblika Mozambike Francisco Miranda Branco no ba Malázia Joana Veneranda Amaral.
Ho nomeasaun ba Embaixadór sira hatudu konfiansa Prezidente Repúblika nian no Governu ne’ebé fó empossada. Prezidente Repúblika fiar katak ho orientasaun husi Ministériu Negosius Estranjeirus embaixadór sira sei esplora oportunidade iha país ida-idak ba benefisiu Timor-Leste.
Vise Ministru Negósiu Estranjeiru no Kooperasaun, Julião da Silva hatete, Embaixadór sira ne'ebé simu ona pose iha tempu badak sei aranka ba nasaun deaignadu sira.
“Embaixadór sira ne'ebé ohin simu posse sira balun sei desloka iha semana ida ne'e balun iha semana oin no balun sei hein karta kredensiál balun husi paíz ne'ebé sira designadu ba”, dehan Julião.
Nune'e Embaixadór Designadu ba Mozambike, Francisco Miranda Branco hatete, sei halo aprosimasuan tanba nasaun Mozambike apoiu Timor-Leste nia prosesu to'o ulun rasik-an.
"Misaun diplomátika ida ne'ebé ha'u simu husi Estadu Timor-Leste sai reprezentante Timor-Leste iha irmaun Mozambike sei halo aprosimasuan di'ak liután ita ho sira tanba sira mak ajuda ita iha tempu difísil liu sira apoiu ita ba ukun rasik-an”, dehan Francisco.
Maibé setór saida de'it mak sei tau prioridade nia seidauk bele esplika tanba presiza halo uluk aprosimasaun hodi identifika setór hirak ne'e mak sai importante.
Ba Embaixadór na’in-lima ne’ebé simu posse, Prezidente Repúblika dezeja susesu ba funsaun nu’udar reprezentante diplomátika Timor-Leste nian.
Pose ne’ebé halo bazeia ba Dekretu Prizedente Repúblika, Prezidente Repúblika nomea Embaixadóres Timor-Leste ba Tailándia, Béljika, Indonézia, Mozambike no Malásia. (*)
