"Agora ida mak ha'u husu ba señor ministru, bele halo esplikasaun sobre estatutu Empreza públika nian, iha ami-nia audénsia, iha Prezidente, iha Vise Prezidente na'in-rua, ne'e saláriu ke boot teb-tebes liu orgaun soberanu hanesan xefe do estadu. Agora Estadu mak nafatin liuhusi OJE prevé ba sira-nia saláriu vensimentu ka sira mak buka osan depois hatama reseita ba Estadu depois restu ne'e sira jere ba sira-nia orsamentu ne’ebé mak hodi selu ba malu”, dehan deputadu FRETILIN, Marito ‘Fatibai’ Mota, iha plenáriu PN, tersa (12/10).
Maske la temi númeru montante maibé husu Governu atu klarifika razaun hari’i Empreza Públika tanba ho saláriu ne’ebé boot sei hasa'e esvanzamentu inklui viola kompromisu politika Governu nian kona-ba poupansa.
"Sé Estadu mak tau nafatin ne'e ha'u konsiders katak ne'e hasa'e esvanzamentu ida ke boot tebtebes, kontrariu ho politik poupansa”, afirma nia.
Tanba hanesan públiku tomak akompaña, pozisaun Governu hamosu empreza públika rua ne'e tanba atu lori retornu ba Estadu, maibé realidade la akontese.
"Kualidade eletrisidade ho bee-moos, até agora ne’e la di'ak. Tinan barak ona Estadu liuhusi Governu halo investimentu boot ba eletrisidade ho Bee-moos. Agora mais pior liu ita hatene katak hari’i EP atu kria kampu de traballu, agora situasaun ne'e kontrariu fali, ba prezudika fali ema ne'ebé tinan barak ona servisu iha ne'ebá ona tenke lakon nia servisu, ida ne'e mak sai preokupasaun tebes iha públiku”, hatete nia.
Pozisaun FRETILIN mós preokupa tanba to'o agora EDTL seidauk iha fasilidade másimu ba tékniku ka traballadór sira atu proteze sira-nia aan bainhira sa’e rin eletrisidade.
"Ita haree katak laiha seguru liu. Tanba fasilidade hanesan, sintu eskada sira ne’e laiha, ha’u haree lori risku tebes ba traballadór sira. Ha’u hanoin katak ida ne'e sai preokupasaun tebes”, informa nia. (*)