"E ohin (20/10), ami halo aprovasaun kalendáriu iha komisaun C, komesa iha dia 4 novembru sei halo audénsia, bolu membru Governu sira mai”, hatete Prezidente Komisaun C, Maria Angélica Rangel, iha PN, kuarta (20/10).

FTanba tuir rejimentu iha artigu 76, katak orsamentu kuandu tama iha komisaun, durante fulan ida komisaun tenke halo audénsia públika ho Governu.

Maibé antes atu halo audénsia Komisaun C sei organiza uluk panórama semináriu orsamentál ida iha Suku Tibar, hodi konvida Governu inklui parseiru sira atu ba esklarese panórama orsamentu enjerál ba deputadu liliu komisaun C, kona-bá OJE 2022 nian, hahú husi loron 27 to'o 29 fulan-outubru.

"Depois de loron-tolu ami halo semináriu, e komesa dia 4 ami sei halo audénsia públika, sei bolu instituisaun relavante sira mai iha Parlamentu Nasionál atu husu ba sira kona-bá sira-nia ezekusaun no preparasaun  orsamentu ba tinan 2022”, esplika nia.

Proposta-lei OJE 2022 ne'e Governu aprezenta ba PN ho karakté normál, tanba ne'e komisaun sei hahú ho panórama orsamentál iha fulan ida ne'e nia-laran

Aleinde  iha loron 4 fulan-novembru mak komisaun C sei kontinua halo audénsia públika ho membru Governu sira.

Iha kalendáriu debate ne'e Komisaun mós halo ona analizasaun katak aprovasaun finál globál ba OJE 2022 ne'e sei hala'o iha loron 17 fulan-Dezembru inklui halo redasaun finál ne'e iha loron 20 fulan-dezembru, hafoin haruka ba Prezidente Parlamentu Nasionál, atu submete ba Prezidente Repúblika. (*)