Tempotimor (Díli) – Eis Prezidente RDTL, Ramos Horta hatete ponte BJ Habibie nu'udar vizaun no filozofia Xanana Gusmão nian.

 

"Inagurasaun ba ponte ne'e ho eis Prezidente Indonézia BJ Habibie nia naran. Ne'e Maun Boot Xanana nia vizaun, filozofia, nia lideransa, hatuur dala ida tan ba povu Timor-Leste nia matenek bainhira iha referendu Timoroan fó liman ba malu. Ita la haluhan terus iha kotuk," hatete Horta iha inagurasaun Ponte BJ Habibie, Kinta (29/08/19) iha Bidau Santana.

 

Laureadu Nobel da paz ne'e temi, eis Prezidente Indonézia  BJ Habibie nia kontribuisaun ba Timor-Leste, boot tebes.

 

"Se nia liga momentu ne'ebá, la halo desizaun ba oin ho referendu. Se nia la halo desizaun para forsa internasionál mai iha ne'e, laiha forsa ida iha mundu ke militarmente liu fali Indonézia. Tanba sistema internasionál la funsiona nune'e, ONU la funsiona nune'e, ONU atu tama tenke iha konkordansia husi poder ida, ne'e Indonézia. BJ Habibie ida korajem halo desizaun ne'e," Horta esplika.

 

Lider ne'e mós kongratula Xanana Gusmão tanba bele halo ida ne'e. Horta dehan, dala ida tan, Xanana hatudu karater Timor-Leste nian ba mundu internasionál.

 

Iha okaziaun ne'e Horta husu atu utilizadór sira utiliza ponte ne'e ho di'ak, tanba ponte ne'e Timoroan nian.

 

 

 

Iha fatin hanesan, Ministeru Reforma Lejislativa Asuntu Parlamentar (MRLAP), Fidelis Leite Magalhães hatete, Governu Timor-Leste konsidera inagurasaun ponte BJ Habibie nu'udar referensia foun ba Timor-Leste no Indonézia.

 

"Inagurasaun ne'e, signifika katak Timor-Leste ho Indonézia hakat naruk ona. Ne'e referensia di'ak ba ita nia istória. Espera katak, ho ponte ida ne'e ho naran BJ Habibie bele sai sinál  ba relasaun ne'ebé di'ak liután iha paz no estabilidade iha rejiaun," hatete Ministru Reforma Lejislativa Asuntu Parlamentar (MRLAP), Fidelis Leite Magalhães iha serimonia inagurasaun Ponte BJ Habibie, Kinta (29/08/19) iha Bidau Santa Ana.

 

Fidelis afirma, inagurasaun ponte ne'e nu'udar onra ida ba eis Prezidente Indonézia, Burhanudin Jusuf Habibie.

 

"Ida ne'e fó onra ba lideransa ida. Lider ida ne'e, iha momentu ne'ebá situasaun difisil nia laran. Maibé, hola desizaun ida iha situasaun ne'ebé komplexu. Maibé, nia foti desizaun ida hodi Timor-Leste determina nia posizaun ba ukun rasik an," nia dehan.