"Ha'u seidauk halo desizaun atu kandidata-an ba Prezidente Repúblika, bele kandidatu ou lae karik, ha'u sei hanoin didi’ak ha'u la ansi, la preokupadu sei iha kandidatu ne'ebé di'ak liután, sira rasik seidauk hatudu-an”, dehan Ramos Horta ba jornalista sira iha Universidade Timor Lorosa'e (UNTL) hafoin sai oradór ba semináriu komemorasaun 28 de Novembru Loron Proklamasaun Independénsia ba dala-46, Kinta (25/11).
Alende ne'e nia parte mós seidauk simu informasaun husi Prezidente Partidu CNRT, Kay Rala Xanana Gusmão, atu tula liman ba nia hodi kandidatu.
"Ha'u seidauk rona informasaun direita husi Maun Xanana atu tula liman mai ha'u no apoiu ha'u ba nia kandudatura iha Eleisaun Prezidensiál tinan oin ne'e", informa nia.
Maibé, karik Xanana Gusmão mak tula liman ba nia, ka partidu CNRT mak husu atu kandidatu, nia parte sei haree didi'ak no tetu didi'ak mak foin bele foti desizaun.
Alende ne'e Akademista Husi Universidade Nasionál Timor Lorosa'e (UNTL) Decano Fakuldade Siénsia Sosiais, Camilo Ximenes de Almeida hatete, nia parte la dúvida bainhira Ramos Horta kandidata-an ba Prezidente Repúblika.
"Iha ha'u-nia oklu, ha'u la dúvida tanba nia ema ida ne’ebé mak iha koñesimentu di'ak nune'e nia mós konsege rezolve problema nasionál hanesan krize iha tinan 2006, tanba ne'e ha'u laiha dúvida ba nia”, dehan Camilo. (*)