"Tamba ita fó-hanoin ohin ita hotu nia luta eróika ba Ukun Rasik-An, ha'u hakarak halo apelu espesiál ba Kombatente sobrevivente sira atu sai modelu di'ak ba kompatriota hothotu. Maluk sira iha dever atu buka hato'o ba kompatriota sira seluk, valór no prinsípius ne'ebé tane metin ita-nia unidade nasionál no lori ita ba vitória, iha Referendu 1999", dehan PR Lú Olo iha selebrasaun 28 novembru iha Darsula, Baukau, domingu (28/11).
Tanba valór no prinsípius luta nian mak barani, determinasaun, espíritu servisu no kapasidade atu konsente sakrifísiu ne'ebé de'it ba povu moris-di’ak koletivu iha Timor-Leste livre no independente.
"Biar ida-idak iha nia hanoin rasik, ha'u fiar katak ita bele tuur hamutuk hodi hetan objetivu estratéjiku liuhusi implementasaun planu dezenvolvimentu Nasional", afirma nia.
Maibe atu valoriza duni eroína no erói sira-nia sakrifísiu ba Timor-Leste, “ha'u konvida kompatriota sira hotu atu kaer hanoin ida no hakarak ida de'it kore-an husi kiak no mukit nu'udar Povu Timor-Leste”. (*)
