"Ohin ha'u dehan ekipamentu sira ne'e, iha semana ida ne'e, ami hahú transporta ba Ataúro hanesan meza komputadór, para ke bainhira administradór hetan ona nomeisaun sira bele utiliza ona fasilidades funsionáriu sira bele utiliza" dehan Miguel Perreira de Carvalho ba jornalista sira iha palásiu Governu, kuarta (05/01).
Pratikamente iha tinan 2022, Postu Ataúru sai ona Munisípiu Ataúru no dadaun ne'e hein aprovasaun nomeiasaun Administradór Ataúru nian.
"Hanesan ko’alia ona iha fulan-janeiru ne'e halo deliberasaun ba administradór Ataúru nian”, hatete nia.
Tanba dadaun ne'e funsionáriu sira prezente ona ne'ebé hahú instala servisu administrasaun nian nomós nomeisaun Sekretária Munisipál Ataúru no diretór sira.
“Iha fatin balun administrasaun identifika ona hodi tinan ne'e ita sei konstroi edífisiu serbisu administrasaun Munisipál de Ataúru”, esplika nia.
Dadaun ne'e MAE identifika ona ema na’in-tolu no hein haruka ba Konsellu Ministru hodi halo deliberasaun nomeisaun ba Administradór Ataúru.
"Minímu ema na'in-tolu, ida tenke feto, mane na’in-rua husi sidadaun Timoroan”, informa nia. (*)