"Ba kandidatu ne’ebé mak husi CNRT rasik fó apoiu ne'e, atu kumpre de'it orden konstituisaun, laiha intensaun seluk ida”, dehan nia iha plenária PN, tersa (25/01).
Maske Deputada Bankada KHUNTO, Olinda Guterres kestiona kona-ba atu mosu golpe hasoru PN bainhira Prezidente Repúblika eleitu husiKandidatu CNRT, maibé ida ne'e CNRT la halo golpe no tinan rua liubá, FRETILIN, PLP no KHUNTO mak halo golpe ba meza PN.
Buat ne’ebé partidu CNRT halo, ida ne'e atu kumpre de'it mandatu konstituisaun, tanba ne'e mak CNRT nia hakarak no laiha intensaun seluk.
"Ida ne'e bankada CNRT dehan rezolusaun, foin mak Konferénsia de'it nakdedar tiha ona, ne’ebé ha’u mós dúvida oituan, hau haree katak ohin deklarasaun bankada FRETILIN nian, balun kala nakdedar ohin kala la tama”, hatete nia.
Ba kestaun ne'e, Xefe bankada FRETILIN, David Dias Ximenes ‘Mandati’ hatete, nu’udar deputadu deklarante sei la nakdedar tanba deklarasaun politika ne’ebé bankada hato'o ne'e atu responde de'it ba deklarasaun disolve parlamentu nasionál ne’ebé fó sai husi kandidatura CNRT.
"Ohin FRETILIN halo ninia deklarasaun politika hodi responde ba deklarasoens ne’ebé iha, ohin dehan fali nakdedar ne'e, ema ida iha ne'e la nakdedar ida, ohin mandati mak halo deklarasaun nia la nakdedar ida”, hatete nia.
Deputada Bankada KHUNTO, Olinda Guterres hatete, maske ladun hatene lian portugés maibé nia rona oituan saida mak bankada FRETILIN hato'o, tanba ne'e husu ba na’in-ulun sira di’ak liu hamutuk ida de'it.
“Keta halo golpe tan. Ida ne'e ha’u husu na’in-ulun sira di’ak liu mai ita hamutuk. Kandidtura ne’ebé mak atu manán ne'e manán ba, labele mai ameasa fali depois ita-nia ema iha baze ne'eba tur rai la metin”, hatete nia. (*)