Tempotimor (Dili)-Primeiru Ministru (PM), Taur Matak Ruak, enkoraja komunidade sira iha Postu administrativu Ataúro, atu hahú ona prepara-an hodi simu mudansa estatutu ba Munisípiu.

“Ita-boot sira prepara-an didi'ak. Hatene, imi hakarak Ataúro atu sai saida, sai oinsá, la presiza mehi boot, mehi barak. Ita presiza hahú buat ki'ik ona. Bee laiha, ita tau matan uluk bee, eskola iha laiha, ita tau matan uluk bee, ahi laiha, haree buat kikoan kikoan", dehan PM Tau iha Ataúro, sesta (11/06).

Dala-barak ema iha mehi ne'ebé boot liu, maibé sukat ho kbi’it rasik la to'o, entaun hela de'it mehi no susar hakat ba oin.

"Entaun, husi buat ki'ik ona. Presiza unidade entre ita-boot sira, para que difine diresaun ida ba ita-boot sira-ninia rai pedasuk oan ne'e ita hotu nian. Mais tau matan, no buka reskursu para depois dezenvolve nia-an", hatete nia.

Maske nune'e, governu sentràl sei la haluha povu sira iha Postu administrativu Ataúro, maibé husu atu servisu maka'as, tanba muda estatutu ne'e hanesan buat todan.

"Ataúro ninia atividade bele aumenta nia volume nia intensidade, ita-boot sira-nia estatutu ne'e importante loos. Hanesan ita-boot sira hatene, kuandu hari'i Oekussi, ita-boot sira halo parte ba Oekussi, sai zona ekonómika espesial ida. Mais mudansa estatutu ida ne'e, hanesan estatutu ida fó tan todan ba imi", afirma Taur.

Tanba muda estatutu Postu administrativu Ataúro nia sai Munisípiu, hanesan família ida ema ida, bainhira nia oan mane ho sira hola malu, ba hari’i ketak nia uma kain ona, ne'e todan.

"Ita depende ita-nia inan aman, ahi mate, ama. Bee laiha, apa. Ne'ebé agora, husu ba ita-nia aan. Mais ne'e hatudu saida. Responsábilidade ita-boot sira, ba Atauro oan sira”, hateten nia.

Administradór Postu Administrativu Ataúro, Mateus Belo, sente orgullu ba polítika Governu liliu Ministériu Administrasaun Estatál (MAE) ne'ebé planeia ona iha tinan 2022 sei muda Ataúro ba Munisípiu.

Ataúrooan sente orgullu, sente onra, previléziu boot ida iha prosesu balu liliu estatutu Ataúro ne'ebé komplementa ba mandatu konstitusional iha konstituisaun RDTL iha artigu 5 no 71 ne'ebé define kona-ba Ataúro sei hetan estatutu espesial.

“Akompaña iha mídia oioin katak prosesu iha parlamentu nasional nia desizaun politika foti ona katak, Ataúro sei munisipiu espesial”, dehan Administradór Ataúro iha Salaun administrativu Postu Maumeta Villa.

Postu administrativu Ataúro ne’ebé preparadu sai Munisípiu dadaun ne’e iha Suku Bikeli, Maumeta Villa, Beloi no Makadadi. (*)

Tempotimor (Dili)-Primeiru Ministru (PM), Taur Matan Ruak, hasoru malu ho komunidade iha Ataúro hodi ko’alia kona-ba preparasaun muda Postu Administrativu sai Munisípiu Ataúro, ne’ebé aprova ona iha konsellu Ministru.

Administradór Postu Administrativu Ataúro, Mateus Belo, sente previléjiu boot ba populasaun iha Ataúro, tanba planu ne’ebé kleur konsege realiza.

 “Primeiru ida ne'e previléjiu boot ida, ami la espera maibé ida hanesan mehi ida postu administrativu nakfilak ba Munisípiu, ida ne'e merese duni tanba ida ne'e konsagra ona iha Konstituisaun RDTL konsagra ona iha artigu tolu, haat, lima”, dehan Mateus liuhusi telephone, sesta (11/06).

Tuir Konstituisaun Republika Demokrátika Timor Leste iha Artigu tolu ne'ebé ko'alia kona-ba sidadaun, no Artigu haat ko'alia kona-ba rai no artigu lima ko'alia kona-ba desentralizasaun.

Aliende ne’e, Primeiru Ministru (PM), Taur Matan Ruak akompaña husi Sekretáriu Estadu Protesaun Sivíl (SEPS), Joaquim dos Reis Gusmăo, fahe apoiu materiál ba vítima dezastre naturál hamutuk 42 iha Postu Administrativu Ataúro.

“Vítima hamutuk 16 ne'ebé hetan dezastre naturál inundasaun iha loron 4 fulan-abríl no antes ne'e iha tinan rua ba kotuk ne'e rejista mós dezastre anin sobu uma, ahi hán uma, entaun atu hetan ajuda ne’e hamutuk 42”, informa nia. (*)

Tempotimor (Dili)-Administradór Postu Administrativu Atauro, Mateus Belo hatete, komunidade sira iha aldeia hitu, Suku Rua iha Postu Administrativu Ataúro durante ne’e konsumu de’it udan been.