Arsenio Bano deklara kestauan ne’e hafoin hasoru-malu ho Primeiru Ministru Taur Matan Ruak iha palasiu governu, Segunda (08/06).

Tuir eis Sekretariu Rejional RAEOA ne’e hatete, nu’udar soldadu, nia sempre prontu kumpre orden ne’ebé komandante fó.

"Karik fo fiar ami soldadu prontu ne'e sempre prontu, ha’u hanesan mos eis titular simu pensaun kuandu governu fó fiar prontu hala'o serbisu," dehan nia.

Nia hatete, nu’udar eis Sekretariu Jeral RAEOA, nia mai hasoru-malu ho PM Taur hodi relata serbisu iha Oekusse.

"Hau eis sekretariu jeral rejional Oekusse no ha’u koñese Oekusse di’ak, serbisu tinan lima ha’u mak halo estudu iha ne'eba, Dotor Mari Alkatiri mak hahú i serbisu barak la'o, tanba ne'e mak Primeiru Ministru bolu ha’u atu konversa uitoan hodi hatene pontu situasaun i depois hanoin atu hakat ba oin ne'e oinsa," nia hatete.

Iha enkontru ne’e, nia dehan, nia simu mós orientasaun lubuk ida husi PM Taur.

"Orientasaun ne'ebé mak ha’u simu lista naruk tebes, maibé importante liu mak Oekusse tenke ba oin," katak nia.