“Nia aleizadu ona ne'e nia labele ba vida militár, tanba nia ruin tohar ona ne'e, tanba militar ne'e la'ós buat halimar, tanba militar ne'e treinu fiziku no bomba rai maka’as no la’ós tur hakmatek de’it iha fatin maibé halai tun sa’e, nia aleizadu ona ne'e ba ona vida sivil, trata tuir lei ne'ebé mak iha”, dehan Xefe Estadu Maior Jenerál F-FDTL, Tenente Jenerál Domingos Raul ‘Falur Rate Laek’, iha Metinaro, kinta (10/03).
Tanba atestadu médiku hatudu katak nia rekopera, maibé alezadu, nune'e nia labele ona hala'o servisu iha vida militar.
“Maibé karik nia rekupera mak mai serbí ne'e di'ak ona, mais nia mai mak nafatin, ita sei fó lisensa ba nia hodi fila ba vida sivíl, ne'e la'ós komandu mak duni sai, maibé nia saúde mak labele atu mantein nia ba iha instituisaun militar ne'e”, afirma nia.
Ho ida ne’e, husu ba membru F-FDTL foun sira, bainhira tempu ferias ba vizita família labele ransu hodi hemu tua iha fatin ne’ebé sente la seguru hodi hetan dezastre.
“Bainhira feriadu ne'e fó tempu ba imi, ba vizita família la’ós la’o tun sa’e hodi hemu tua, ransu tun sa’e hemu tua, halo kanek imi-nia an, ne’e imi mak lakon servisu”, informa nia. (*)